Siulittaasutut inissinnissaq ammavoq
Inatsisartut siulittaasuata inuttalerneqarnissaa naalakkersuisoqatigiinnissamut ilanngunneqanngilaq. Naalakkersuisooqatigiittussat siunnersuutigaat Josef Motzfeldt.
Josef Motzfeldt 67-inik ukiulik tallimanngorpat Inatsisartut siulittaasussaattut partiinit naalakkersuisooqatigiinnut tunuliaqutaasunit siunnersuutigineqassaaq.
Siulittaasutut inissinnissaq ammavoq, siunnersuutigineqartoq oqarpoq.
- Isumaqatigiissutigaarput partiit tamarmik siulittaasussamut siunnersuuteqarnissaminnik periarfissaqassasut, taamaatumik uagut naatsorsuutigaarput allannik siunnersuuteqartoqassasoq, Josef Motzfeldt oqarpoq.
Kisiannimi ilissi amerlanerussuteqarpusi, illit tamanna qularutigisariaqannginnakku?
- Uagut toqqarsimavarput ammatinniarlugu taava takujumaarparput uanga siulittaasussatut qanoq tapersersorneqartiginersunga, Josef Motzfeldt oqarpoq.
Partiit illuatungiliuttut, Siumut aamma Atassut, suli isummerfigisimanngilaat namminneq siunnersuuteqassanerlutik, imaluunniit Josef Motzfeldt tapersissanerlugu, partiit siulittaasui Aleqa Hammond aamma Finn Karlsen sermitsiaq.gl-imut oqarput.