Siumumi ilaasortat Upernavimmukassapput
Siumut sinnerlugu Inatsisartuni ilaasortat pingasut innuttaasunik naapitsiniarlutik Upernavimmukarlutillu Upernaviup nunaqarfiinukarniarput.
Inatsisartuni ilaasortat naalakkersuisunut nutaanut illuatungiliuttunngorsimasut juunip 19-aniit 26-ata tungaanut Upernavimmi Upernaviullu nunaqarfiini angalassapput.
- Innuttaasut Inatsisartuni maanna suliavut pillugit ilisimatinniarpavut. Soorunami aamma taavani partiitta immikkoortortaqarfia qanoq ingerlanersoq paaserusupparput. Aaamma qinersisartut qanoq ingerlasoqarnersoq paaserusullugu naapinniarpavut, Jess Savane (S) Sermitsiaq.AG-mut oqarpoq.
Karl Tobiassen, Jess Svane aamma Aslak V. Jensen tassaapput Upernavimmukarlutillu Upernaviup nunaqarfiinukarniartut. Inatsisartuni ilaasortat taavaniinnerminni tamanut tikinnissartik anguniarniarpaat.
- Sapaatip akunnerata ingerlanerani nunaqarfiit tamaasa tikinniarsarissavavut. Politikkimi illoqarfinnit anginernit kisimi ingerlanneqanngilaq, inuit sineriammiitttut qanoq uummammioqarnersut aamma tusarusupparput. Tamatumunnga pitsaanerulerusuppugut, Jess Svane oqarpoq.
Siumut nutaamik periusissiaqalersimasoq
Siumut apriilip qaammataani Inatsisartunut qinersisoqarmat Upernavimmi taasisimasut 39,3 procentiinit taaguunneqarsimvoq, kommunimullu qinersisoqarmat taasisimasut 38,1 procentiinit taaguunneqarsimalluni.
Nuna tamarkkerlugu politikki eqqarsaatigissagaanni, Upernavimmi partiimut taasisartut kingullermik qinersisoqarneranut sanilliullugu 3,7 procentimik amerlerialaarsimapput, illoqarfimmili kommunimut qinersisoqarnerani taasisartut 13.6 procentimik ikileriarsimallutik.
Nunatsinnilu partiit annersaata tulliata soqutigineqaqqilernissani maanna anguniarniarpaa.
- Ukiumi aggersumi qinersisartuvut tikinnerusalerniarpavut. Innuttaasunut tusarnaarnerusariaqarpugut, siunnersuutissamullu atatillugu paasissutissanik katersinitsinni tunuliaqutaasutut ilisimasaaannik aamma paasisaqarfigerusuppavut, Jess Svane oqarpoq.
Siumut sinnerlugu Inatsisartuni ilaasortat taamaallaat Upernavimmukarnianngillat, Lars Poulsen Inatsiartunut aamma qinigaasimasoq juunip ingerlanerani Tasiilamukarniarpoq.