Siumumi siulittaasumut tullinngorniunneq aallartippoq
Siumup, aqagu Ilulissani ataatsimeersualersussap, siulittaasuata tullissaannut marlunnut qinigassanngortittut pingasut maannamut sassareerput. Aleqa Hammondili siulittaasup tullinnguunniuttunut akuleruteriaannaavoq.
Inatsisartuni ilaasortaq naalakkersuisunilu ilaasortaasimasoq, Doris Jakobsen, Siumup siulittaasuata tulliatut siullertut, naalakkersuinermik sulianik sammisalittut qinigasanngortippoq, aaqqissuussaanermillu ingerlatsinermik nakkutilliisussatut sassartut marluullutik, tassaasut Narsap borgmesteria Kista P. Isaksen Paamiunilu immikkoortortaqarfiup siulittaasua Enok Broberg.
Siumup allattaa Mikael Petersen taama ilisimatitsivoq.
Jonathan Motzfeldt, qanittukkut Inatsisartuni siulittaasutut tunuartoq, siulittaasup tulliatut siullertut sassaqqinnissaminik eqqarsaateqanngilaq.
- Siulittasup tulliatut qinigaaqqinnissara naatsorsutigivallaanngilara, siulersuisuunernilu inissamik pisinnaanissara qularutigaara, inatsisartuni ilaasortaq ataasiinnaq inissaqartiussaammat malittarisassat nutaat akuerineqassappata, Jonathan Motzfeldt oqarpoq, erseqqisaatigaalu kajumissaarneqassaguni aatsaat sassarniarluni.
Naalakkersuisuni ilaasortaq Aleqa Hammond, Siumup siulittaasuatut qanittukkut qinersinermi normu 2-jusoq (648-nnalluni Hans Enoksen 821-nnattoq, aaqq.) nammineq siulliulluni siulittaasup tulliatut qinigassanngortinnianngilaq.
- Aatsaat tunuliaqutassaqaruma sassarnissara eqqarsaatigisinnaavara. Siulittaasussarsiornermili taasiserpassuakka eqqarsaatigissagaanni kajumissaarneqassaguma qinigassanngortinnissamut piareersimavunga, Aleqa Hammond oqarpoq.
Tapersersortissarli ataaseq qulakkeereerpaa, tassalu inatsisartuni siulittaasutut tunuaqqammersoq.
- Siulittaasumut qinersinerup inernera isumaqassappat Aleqa Hammond siulittaasumut tulliusariaqarpoq, Jonathan Motzfeldt oqarpoq.
Siumup siulersuisuunerinut qinersisoqassaaq tallimanngorpat, nalunaarfissarlu kingulleq ulloq taanna ulloqeqqanut qaangiutissaaq.
Taasisinnaasut 83-it ataatsimeersuarnermi peqataassapput.