Siumumi siulittaasunngorniunneq: Angusanik patajaassusermillu tunniussivunga tamannalu nangikkusuppara
Siumup siulittaasua, siulittaasussatut sassaqqittoq isumaqarpoq naalakkersuisooqatigiit maanna atuuttut pitsaasumik patajaatsumillu ingerlasut nangittariaqartullu - inuiaqatigiit pillugit.
Suli ilisimaneqanngilaq Siumup ataatsimeersuarnissaa aammalumi Siumumi siulittaasunngorniunneq naalakkersuisooqatigiinnut qanoq kalluaassanersoq. Taamaattorli partiip maannakkut siulittaasorisaa aalajangiissasuuppat, naalakkersuisooqatigiit qaammatip matuma naalernerani Siumut ataatsimeersuareerpat ingerlaqqissapput.
Taamaalilluni Erik Jensen erseqqissaavoq nammineq qulakkeerusullugu naalakkersuisooqatigiit maannakkut atuuttut ingerlaannartariaqartut, aaqqissuusseqqinnerillu maanna ingerlanneqaleruttortut piviusunngortittariaqaraat, taakku inuiaqatigiit atugarissaarnerulernissaannik kinguneqassanerarlugit.
- Piviusoq tassaavoq innuttaasut ilarpassui ilungersungaarlutik atugarliorlutillu inuummata. Ajornartorsiuteqarpugut pinngitsoorata qiterpiaa suunersoq paasisariaqakkatsinnik, tassanngaaniillu ajornartorsiutaasut aaqqiiviginiarnissaat tikittariaqarpagut suliassallu imaannaangitsut aallartereerpagut, ilaatigut pisuut piitsullu akornanni qupparsuaq alliartuinnartutut ittoq mumisittariaqarparput, suliarlu taanna maanna ingerlatileruttorparput, ingerlaannarsinnaaqqullugulu ataatsimeersuartunut noqqaassaanga suliaq partiitsinni siuttuuffigalugu ingerlatiinnarumallugu, Erik Jensen Sermitsiaq.AG-mut oqarpoq nangillunilu:
- Partiitut anginerpaanngoqqinnissarput Inatsisartunut qinersinermi kingullermi angunngikkaluarlutigu - Naak Siumut siuariaraluartoq, soorunami demokratiimik ataqqinnittuarnikuuvugut aammalu qinersinerup inernera akuersaarlutigu. Toqqarnikuuarput qinersinerup inernera angusaqarniarluta atussallutigu, taamaammallu akisussaaffimmik tiguseqataavugut april 2022-miit, tamannalu siulersuisut tamarmik aammalu Inatsisartuni gruppep akuersinerisigut pivoq, taamaalillutalu avissaaqqissaaqqasumik politikki qimapparput, Erik Jensen naliliivoq nangillunilu:
- Aalajangerneq taannarpiaavoq, maanna angusanik takusaqarfigisaligarput, uangalu qulakkeerinnikkusuppunga parteerput nangittumik agusarissaassasoq. Isumagami malillugu inuiaqatigiit partiitsinnut tatiginninnerat nangittumik annertusassavarput, Siumumi siulittaasutut nangikkumalluni sassartoq Erik Jensen oqarpoq.
Børnene betaler den dyreste pris
Erik Jensen suliassaminik pingaarnersiuinermini ilaqutariippassuit nunatsinni pitsaasumik toqqissisimasumillu atugaqarnerat taassuma qularinnginnerarpaa. Taamaattorli piviusoq tassaanerarpaa ilaqutariit amerlavallaartut inuuniarnermikkut artorsartut, naak nukippassuit atorlugit ikiorneqarnissaannik aqqutissiuussisoqartuaraluartoq. Taamaammat taanna inuiaqatigiinni isumaginninnikkut ajornartorsiutaasut qiterpiaat tikillugu sulerusuppoq. Taannami isumaqarpoq isumaginninnikkut qajannaallisaaneq tassaammat namminiilivikkiartuaarnerup nanginneqarnissaanut suliareqqaagassaq:
- Meeqqat amerlavallaartut angerlarsimaffimminnit qimagutsitaasarput, allammi aamma meeqqanut ulloq unnuarlu angerlarsimaffinnik sanaartonerit annertuallaat ingerlanneqarput, illuatungaanili isumaginninnikkut ajornartorsiutit annikillisarniarlugit suliniutit kissaatigineqartutut pitsaasumik sunniutigisartagaat annikitsuinnaapput. Innuttaasut ilarpassui imigassamik aalakoornartumik ajornartorsiuteqarput, ikiaroornartoq pissutaalluni inuunerluuteqarput allaallumi aningaasanoorajunnerit takornartaanatik, tamakku immikkut iliuuseqarfigineqartariaqarput, tassami katsorsartissinnaaneq akeqanngikkaluartoq sunniutai annikippallaarujussuarsorinarput.
- Tassa suliniutit qanoq pitsaatigisumik pitsaanngitsigisumilluunniit sunniuteqartarnersut pillugit angusanik uuttuisarneq amigaatigaarput, tassami suliniuterpassuugaluarput innuttaasut tamarmik pitsaasumik atugaqarlutik toqqissisimallutillu inuuneqarsinnaanissaannut ilapertuutaasussat. Pinaveersaartitsinerit, pinngitsuuisinnaajunnaarsimasunut katsorsaassarnerit allallu ajunngitsumik siunertaqarluni suliniutit sooq taamak sunniuteqaqqalaartiginersut nalilersorneqaqqittariaqarpoq, ajornartorsiutitta qiterpiaa sunaassusersissagutsigu; Sooq suliniutit sunniuteqarneq ajorpat? Erik Jensen aperivoq naqissusiillunilu: meeqqat, uagut siunissagut, taakku akisunerpaamik akiliisinneqartarput, tamannalu assut ajuusaarnarpoq.
Innuttaasut neriuuteqalersinneqassapput
Erik Jensen isumaqarpoq naalakkersuisooqatigiit massakkut atuuttut suliniutaat kinguneqarluassasut, nanginnissaminnut periarfissaqassagunik:
- Suliarerusutanni sallersaavoq innuttaasut toqqissisimasumik inuuneqarsinnaanissaat nukittorsassallugu, tamannalu pissaaq kommunit qanimut suleqatigalugit. Innuttaasut neriuuteqalersinneqassapput aammalu pissutissaqarluarlutik upperissavaat nunap siuttuisa atugassat pitsanngorsassagaat. taamatuttaaq innuttaasut nunatsinni sumiluunniit najugaqaraluarunik neriuuteqalersinneqassapput kiffaanngissuseqarlutik namminneq sumiikkusunnertik aallaavigalugu inuunerminnik ingerlatsisinnaallutik.
- Utoqqaat sumiikkusunnertik namminneq aalajangertassavaat, soorunami kinguaariinnut allanut aamma tamanna atuutissaaq. Taamaammanuna aaqqissuusseqqinnerit annertuut massakkut ingerlakkigut, taakku tamaasa aqqutigalugit innuttaasut ataasiakkaat inuuniarnermikkut oqilisaaffigineqarnissaat siunertarineqarluni. Tassami angusagut pitsaappata inuuniarnikkullu atugarissaarnerulertoqarpat, innuttaasut nukittuut pissarsiarissavagut, innuttaasullu nukittuut tunuliaqutaralugit inuiaqatigiit inerisassavagut, aamma politikkikkut aalajangigassat annertoorsuit nukissaqarfigilluassavagut, Erik Jensen oqarpoq.