Siumup ataatsimeersuarnera: Naammagittaalliuutit arlalissuit siulersuisut nutaat suliarissavaat
Paasissutissat siammartigassaanngitsut siulersuisunit suli akuerineqanngitsut siammarterneqarsimasut. Siulittaasussarsiornermi ataatsimeersuaqataasut sunnerniarneqarsimasut, inuit attaveqaqatigiittarfiisigut malersuinerit, taakku tassaapput Siumup siulersuisuinut naammagittaalliuutigineqartut ilai siulersuisut nutaat suliarisassaat.
Nuannaarluni erinarsuataarnerit, oqalugiaatit tusarnersut aammalu minnerunngitsumik nuannersumik katersuunnerup tunuanittoqarpoq ilungersunartunik nuannaarnerullu muningani taaneqarsinnaasunik.
Partiip siulittaasussarsiornera sioqqullugu Sermitsiaq.AG ilisimasaqalerpoq, ataatsimeersuarneq sioqqullugu partiimi siulersuisut aammalu ataatsimeersuaqataasussallu eqqissillutik sulisinnaatitaasimanngitsut.
Paasissutissat suli oqaatigeqqusaanngitsut anillatsinneqarsimasut
Siumup siulittaasua, Erik Jensen ataatsimeersuarneq sioqqullugu piareersaalluni assut ulapissimavoq. Ulapinneq politikkimut tunngaannarsimanngilaq, aammali ilaasortat naammagittaalliuutaannik apuunneqartunik ulapputeqarsimavoq.
Ataatsimeersuarnerup nalaani aammalu siulittaasussarsiorneq sioqqullugu, Sermitsiaq.AG partiimi ilaasortanit arlalissuarnit ilisimatinneqarpoq avataaniit sunniiniartunit kimigiiserfiginnittoqarsimasoq.
Namminneq nalaataqarsimasunit arlalinnit oqaluttuunneqarpugut attaveqaatit aqqutigalugit, siulittaasussarsiorneq aalajangersimasumik inerneqartinneqassasoq siunertarineqarluni attaveqaqattaartoqarsimasoq. Siulittaasussarsiuunnermi sunniiniartarneq immini ajornartorsiutaasussaanngikkaluartoq, taamaattorli periuserineqarsimasoq pissusissamisoorsimanngitsoq naapertuilluarnermillu tunngaveqarsimanngitsoq, Erik Jensen tikkuaavoq.
- Tamanna ilumoortoq naqissusersinnaavara. Tamannalu ilungersunartorujussuuvoq, pingaartumik paasissutissat suli siammarneqartussaanngitsut siammarterneqarsimammata, tassami siulersuisut suliluunniit ataatsimiissutigalugit naammassinikuunngisaat akuersissutiginikuunngisaallu pineqarmata. Tassani pineqarpoq ataatsimeersuaqataasussat aqqi, Erik Jensen oqaluttuarpoq nangillunilu:
- Paasissutissanik suli siammarterneqaqqusaanngitsunik pissarsisimasut paasissutissat taakku atorlugit ataatsimeersuaqataasussat attavigisaqattaarsimavaat, sianerfigalugit, messenger aqqutigalugu allaffigalugit aammalu sms aqqutigalugu attavigisaqattaarlugit, paasivarpullu siunertarineqarsimasoq siulittaasussarsiornermi kimik taasinissaannik sunniiniartoqarsimasoq, tamannalu pillugu naammagittaalliuutinik arlalissuarnik apuussisoqarpoq, Erik Jensen oqaluttuarpoq.
Taamaakkaluartorli siulittaasussarsiornermut qanippallaaqimmat, siulersuisut atuukkunnaartut aalajangersimapput naammagittaalliuutit siulersuisunut nutaanut ingerlateqqinneqassasut, Erik Jensen ilisimatitsivoq.
Inuit attaveqaqatigiittarfii aqqutigalugit nakkarsaanerit inunnillu malersuinerit
Paasissutissalli suli siammarterneqaqqusaanngitsut, inuit ataasiakkaat pillugit paasissutissartallit siammarterneqarnerisa saniatigut aamma pingaartumik inuit attaveqaqatigiittarfii aqqutigalugit inoqatinik nakkarsaanerit malersuinerillu pillugit naammagittaalliuuteqartoqarsimasoq paasinarpoq.
- Pissusissamisuunngilluinnarpoq eqqissiviilliortitsitsineq taamak annertutigisoq partiitsinni atuutilersinniarneqarsimammat, ilaasortagut toqqissillutik partiimut ilaasortaasussaapput aamma ilaasortarpassuatta kimigiiserfigineqarsimanerat pissusissamisuunngilaq akuersaarneqarsinnaananilu. Allaat ilaasortatta ilai inuit attaveqaqatigiittarfiisigut aqqi taagorlugit nakkarsarneqarlutillu malersorneqarsimapput, ilai inuttut aamma nakkarsarniarneqarsimapput malersorneqarlutillu, tamakkulu aamma naammagittaalliuutigineqarput. Siulersuisut maanna atuutilersut naammagittaalliuutit isummerfigisussanngorpaat, Erik Jensen, ilaasortat ataatsimeersuaqataasussat ataatsimeersuarneq sioqqullugu ataatsimeersuarnerullu nalaani qanoq pineqarsimaneri pillugit kissaammersimaqisoq oqarpoq.
Aperineqarami ilisimaneraa paasissutissat suli siammarterneqaqqusaanngitsut kimit siammarterneqarsimanersut, kikkut sianeqattaarsimanersut attaveqaqattaarsimanersullu, kikkut inoqatiminnik malersuisimanersut nikanarsaasimanersullu, Erik Jensen aternik taasaqarumanngilaq.
Erik Jensen nassuiaavoq siulersuisunngortut naammagittaalliuutit apuunneqarsimasut suliarissagaat aammalu isummerfigissagaat kinguneqartitsisoqassappat qanoq kinguneqartitsisoqassanersoq.