Siumup ataatsimeersuarnera: Uranip saniatigoorineqarsinnaanera periarfissaassaaq
Siumup siulersuisuuneri atorunnaalivissut Siumup anguniagaasa nutarterneqarnissaanut siunnersuutiminnik saqqummiussipput. Partii kingumut naqissusiivoq uranip saniatigooralugu isertitsissutigineqarsinnaanera suli periarfissaassasoq, taamatuttaaq Kuannersuarni aatsitassarsiorsinnaaneq suli periarfissaassasoq.
Anguniagassatut 2023-2026-mi atuuttussatut siunnersuutit 90-it pallillugit qupperneqartut politikkikkullu anguniagassarpassuarnik imaqartut isummersorfigineqartussanngorlugit tunniunneqarput. Tassa siulersuisutut tunuartussanngortut ataatsimeersuartunut tunniussaat.
Siunnersuutit ilarpassui siuliani anguniakkanik nangitsissutaapput, taamaattorli aamma nutarterisoqarsimalluni. Maannalu ataatsimeersuartut siunnersuuterpassuit taakku siulersuisut tunuartussanngortut 2023-2026-mi anguniagassatut siunnersuutaat sukumiisumik oqallisigalugillu aalajangiiffigisussanngorpaat.
Uranimut politikki suli attanneqarpoq
Inatsisartuni amerlanerussuteqaqqalaartut aalajangiunnikuuaat aatsitassat uranitallit piiarneqarnissaat Nunatsinni inerteqqutaalluinnassasoq. Taamaalilluni uranimik il. il., misissueqqaarnermut, ujaasinermut piiaanermullu inerteqquteqarneq 1. december 2021-mi atuutilersinneqarpoq.
Taamaattorli maanna soorlu paasinarsisoq inerteqquteqarneq taanna taamaallaat atuutissasoq Inuit Ataqatigiit Inatsisartuni, taamaalillunilu aamma Naalakkersuisuni aalajangiisuusumik pissaanermi siuttuutillugu.
Tassami partiimi Siumumi siulersuisut tunuartussanngortut siunnersuuteqarput aatsitassarsiornermi (aatsistassat qaqutigoortut piiarneqarneranni) uranip saniatigut isertitsissutaasinnaanera periarfissaaleqqissasoq.
Taamatuttaaq Kuannersuarni piiaasinnaaneq periarfissaatinneqarusuppoq
Uranimut inerteqquteqarnerup atuutilersinneqarneratigut Kuannersuarni Narsap eqqaaniittumi aatsitassat qaqutigoortut piiarneqarnissaat periarfissaajunnaarsinneqarpoq, tassanimi aatsitassat qaqutigoortut piiarneqarsinnaanginnamik uranitaa qaqinnagu.
Tamatuma malitsigisaanik maanna ETM-ip (siornatigut Greenland Minerals) Naalakkersuisullu akornanni saqitsaattoqalernikuuvoq, tamatumalu malitsigisaanik Nunarput 76 milliarder koruunit missaannik akiligassaqalersinnaalluni, ingerlatseqatigiiffiup tassani aatsitassarsiornissamut akuersissummik itigartinneqarnerup malitsigisaanik.
Siumumi siulersuisut tunuartussanngortut periarfissaatikkusuppaat Kuannersuarni aatsitassarsiorsinnaaneq suli periarfissaatinneqassasoq, tassani erseqqissaatigineqarluni avatangiisinut peqqussutsimullu isumannaallisaatit sakkortusisat avaqqunneqarsinnaanngitsullu naammassineqarsinnaappata.
Ataatsimeersuarnermi peqataasut siulersuisut tunuartussanngortut siunnersuutaat malissaneraat arfininngornermi ualikkut kingusissukkut erseqqinnerusumik paasisaqarfigineqarsinnaavoq, 2023-2026-mi anguniagassatut siunnersuutit eqimattakkaarluni oqallisigineqareerlutik saqqummiunneqarneranni ataatsimeersuartunit siunnersuut ilalerneqassappat.