Siumup aviisit taperniarpai
Nunap Karsia ikiuuttariaqarpoq Tele Postip nassiussinermik tapi peerniarpagu. Siumut taama isumaqarpoq aamma eqqumiigalugu Namminersorlutik Oqartussat sulisussarsiorluni ussassaarutit nunatsinni tusagassiuutinit peersimagunarmagit.
Ataasinngornermi unnukut Inatsisartut kultureqarnermut ataatsimiititaliaa nunatsinni aviisit marluk AG Sermitsiallu aaqqissuisuuneri ataatsimeeqatigai. Taakku aviisit maannakkorpiaq unammisassai pillugit saqqummiussipput, ilanngullugu Tele Postip nassiussinermi tapimik peersiniarnerata sunniutissai saqqummiunneqarlutik.
Aviisit aningaasaqarnerannut iluaqqutaanngilluinnartumik Namminersorlutik Oqartussat kalaallit aviisiini sulisussarsiortarneq unitsissimagunarpaat, danskilli aviisii atornerujumalersimallugit.
Siumup kultureqarnermut ataatsimiititaliaani ilaasortaq Malik Berthelsen Naalakkersuisunut § 36 aqqutigalugu apeqquteqaammik nassiussivoq. Taassuma paaserusuppaa aningaasat qanoq amerlatigisut ileqqaarneqartarnersut sulisussarsiornerit Danmarkimut nassiuttarnerisigut.
– Ilisimalluarpara uagut politikkerit akisussaatinneqassanngitsut sulisussarsiorluni ussassaarinernit aqqutigalugit aviisit ataannarnissaat qulakkeersinnaagipput. Kisianni kalaallit danskillu aviisiini akit assigiippata, taava uagut politikkerit soqutigisariaqarparput aningaasat Kalaallit Nunaanni kaaviiaarnissaat nunanut allanut soorlu Danmarkimut ingerlatinnagit, Malik Berthelsen apeqquteqaamminut tunngavilersuummini allappoq.
Malik Berthelsenip ilanngullugu erseqqissarpaa Siumup aviisit pisortanit Nunap Karsia aqqutigalugu taperneqarnissaat periareersimaffigigaa.
– Tamatuma saniatigut nalunngilarput Post Greenland aviisit taperneqartarnerannut akisussaatinneqassanngitsoq, Siumumiit Naalakkersuisut kaammattussavagut Inatsisartut aningaasanut inatsisaatigut kiffartuussinissamik isumaqatigiissummut illuartitsisoqarnissaa.
– Tamatta qulakkeertariaqagarput tassaavoq innuttaasut aviisinik nutaarsiassanik imalinnik, isummersuutinik nutaanik kiisalu Kalaallit Nunaata ulluinnarni assigiinngitsumik inuuffigineqarneranik atuarsinnaanerannut periarfissaqartuarnissaa, Malik Berthelsen allappoq.