Siumup immikkoortoqarfii: Pissaaneqarniunnermut nukiit atoqinagit

Siumup Sisimiuni Maniitsumilu immikkoortoqarfiisa immikkut ittumik ataatsimeersuarnissaq aammalu ikerinnakkut qinersinissaq akerleraat. Immikkoortoqarfiit taakku marluk ataatsimut tusagassiutinut nalunaaruteqarlutik allapput nukiit politikkikkut anguniakkat piviusunngortinnissaannut atoqqullugit pissaaneqarniunnermut atornagit.

Siumup Sisimiuni Maniitsumilu immikkoortoqarfiisa Hans Enoksenip Siumumit tunuarnera tusaatissatut tiguaat. Naalakkersuisulli Inatsisartuni ataatsimik amerlanerussuteqaqqalaaleraluartut uniinnartoqartariaqanngitsoq immikkoortoqarfiit taakku isumaqarput.

Amerlanerussuteqarneq atorsiuk
- Immikkut ittumik qinersititseqqinnissamut immikkullu ittumik ataatsimeersuarnermut nukiit atorneqartariaqanngillat, inuiaqatigiinni suliassat pingaartullit pillugit ataatsimoorluta sulisariaqarpugut, inuiaqatigiinni avissaartuutsitsiniarsarinermut nukigut pisinnaasagullu atornagit. Ejnar Lundblad Siumut Sisimiuniit aamma John Olsen Siumut Maniitsumiit nalunaarput.

Taakku tamarmik Hans Enoksenip Siumumit aninera tusaatissatut tiguaat.

- Kaammattuutigissavarput Inatsisartuni politikkikkullu sulinermi amerlanerussuteqartut aalajangerneri ataqqineqartariaqartut, ikinnerussuteqarneq ikinnerussuteqarneruvoq taamaattumillu amerlanerussuteqartut amerlanerussuteqarnertik tunngavigalugu apeqqutini pingaaruteqartuni aalajangersimaneri aamma ataqqineqartariaqarput, Ejnar Lundblad aamma John Olsen oqarput.