Siumup Inatsisartuni gruppia nutaamik siulittaasoqalerpoq
Karl-Kristian Kruse Siumup Inatsisartuni gruppiani siulittaasutut tunuarniarluni aalajangerpoq
Siumup Inatsisartuni gruppia allannguuteqarpoq, tassami Karl-Kristian Kruse siulittaasutut tunuarpoq upernaaq. Doris J. Jensen maanna siulittaasuulerpoq.
Tamanna Karl-Kristian Krusep Sermitsiaq.AG-mut oqaatigaa.
- Siumup Inatsisartuni gruppiani allannguuteqartoqartarnera takornartaanngilaq. Ukiup ingerlanerani aalisariarlungalu piniariallattaavunga, maannalu siulittaasunngortoq siulittaasuunissamut piffissaqarneruvoq, Karl-Kristian Kruse oqarpoq.
Inatsisartut ataatsimiilinnginneranni allannguuteqartoqarsinnaasoq oqaatigaa.
Kim Kielsen tapersersorpaa
- Inatsisartut ataatsimiilinnginneranni gruppimi siulittaasussatut sassaqqissavit?
- Tamanna naatsorsuutiginngilara, akivoq.
Kim Kielsen siulittaasutut tapersersorlugu aamma naqissusiivoq.
- Aalajangiussai kisimik malinneqartartut inuppassuit isumaqarput, taamaattoqanngitsorlu naqissusersinnaavara. Siulersuisut ataatsimiittarput, amerlanerussuteqartut aalajangiussaat malinneqartarlutik. Kim Kielsenimut tapersersuinera aamma allanngunngilaq, oqarpoq.