Siumup Inuusuttai: Umimmanniarneq siuartinneqarli
Umimmanniarnerup sapaatip akunnerini marlunni siusinaarluni ammaanneqarnissaa Siumup Inuusuttaannit neriuutigineqarpoq - tassani meeqqat eqqarsaatigalugit siunnersuuteqartoqarpoq
Piniarfik 1-mi, 3-mi aamma 4-mi, Maniitsup eqqaaniittumi, umimmanniarneq aggustip aallaqqaataani ammaanneqartariaqartoq Siumup Inuusuttunut Suleqatigiiffia isumaqarpoq.
Naalakkersuisut siunnersuutaat, aggustip 15-ani ammaanissaq, isumaqatigineqanngilaq. Taanna maanna tusarniutigineqarpoq.
Meeqqat inuusuttullu
- Siumut inuusuttunut suleqatigiiffianiit kissaatiginngilarput qangatut aavartartut eqqornerlunneqarnissai, tassami suliffeqarfippassuit kissaatigisarpaat ukiup aallartinnginnerani feriarfissat inissinneqarnissaat tassanilu ilaqutariit ataatsimut feriassatik inississorajuppaat pingaartumik qitornaqarsimagaangamik qitornaasa atuanngiffeqarneranni qangatut aavartartut ulluliigajupput, SIS-imit allaaserineqarpoq.
Siumup Inuusuttunut Suleqatigiiffiani isiginiarneqarpoq meeqqat inuusuttullu atuanngiffeqarnerminni qangatut aavartartut/pilisartunut ilaqutaasut, minnerunngitsumik inuusuttorpassuit ilinniartut, sunngiffimmi inuussutissarsiutigalugulu piniartut annaaneqassasut.
- Naalakkersuisut kissaateqarfigaagut pinngortitalerisut siunnersuutaat tassalu 15. August piniarfiit 1,3,4 ammarneqarnissai itigarteqqullugu qangaaniilli ammartarfiat 1. August atoqqullugu.
Tusarniaaneq
Umimmanniarnerup qaqagu unitsinneqarnissaa suliniaqatigiiffimmit aalajangiusimaneqanngilaq.
Tusarniaaneq juunip 26-ata tungaanut atuuppoq.