Siumup inuusuttortai: "Inersimasut" ilinniarfigisinnaavaatigut
Siumup inuusuttai, ataatsimeersuaqqammertut inuusuttunut atugassarititaasut pillugit anguniagassanik aalajangersaapput. Tamatumali saniatigut aamma politikkikkut isumaqatigiinngissutigineqartut qanoq aaqqiiffigineqarsinnaanersut pillugu isummersorput.
Politikkikkut silaannaq anorersuarsiorfiungaatsiarpoq partii Siumut julip naanerani ataatsimeersuarmat. Politikkikkut inuttullu angorusutat annertuumik kimigiisissutigineqarput, aammalu pingaartumik partiip siulittaasussarsiorneranut atatillugu pissusilersuutit apeqqusernarsinnaasut atorneqarput.
Taamatulli pisoqartariaqanngilaq. Tamanna partiip inuusuttaasa ataatsimeersuarnerminni uppernarsarpaat:
- Ataatsimeersuarnerput akerliussutsimik mumisitserusunnermilluunniit takutitsinertaqanngilaq. Aaqqiissutissat ujartorpagut aporaaffissaanngitsut aamma isumaqatigiinngissuteqaraluaraangattaluunniit, ataatsimoorluta naapiffissarsiortarpugut, assigiinngisitaartunillu isumaqartoqarsinnaanera inissaqartilluarlutigu, tamannalumi iluatsilluarparput. Taamaammat aamma ataatsimeersuarnitsinni politikkikkut pingaarnersiuinermi siuarsaavigerusutagut aallulluarpagut, taakkulu tassaapput inuusuttunut atugassarititaasunik pitsanngorsaanissamut tunngaasut, partii Siumup inusuttaani siulittaasunngorlaaq, Paarnannguaq Jonathansen nassuiaavoq.
Siumup inuusuttaasa pitsanngorsaavigitikkusutaat tassaapput inuusuttut ilinniartut ilinniarnermik saniatigut suliffeqartarneranni pissutsit aaqqiiffigisassat, inuusuttunut inissiat amerlassutsimikkut naammattut aammalu inuusuttut suliffissaaleqisut sulilersinniartarneranni aporfilersuutit piiarneqarnissaat, tamakkuupput pingaartillugit Siumup inuusuttaanit ataatsimeersuarnermi oqaluuserineqartut.
Inersimasut ilinniarfigisinnaavaatigut
Siumup inussuttaasa siulittaasortaavat, Paarnannguaq Jonathansen tinnersaavoq inersimasortamik inuusuttatik ilinniarfigisinnaagaat:
- Isumaqarpunga uagut inuusuttortaasugut isumaqatigiinngittoqartillugu naaperiaasinnaassuseqarnerusartugut, tusarnaarnerusartugut aammalu politikkikkut oqaloqatigiinnermi paaseqatigiinniarnissamut periarfissiillaqqinnerusartugut. Isumaqarpunga inersimasortatta politikkimik suliaqarnermi torersumik ingerlatserusussuseqarnerput ilinniarfigilluarsinnaagaat, Paarnannguaq Jonathansen oqarpoq, taannali aamma erseqqisssaavoq partiip inuusuttortaminut tapersersuinera pitsaasuusoq patajaatsuusorlu.
Sermitsiaq.AG arbejder på at få et interview med formanden for moderpartiet Siumut om opfølgning af de voksnes landsmøde.