Siumup naalakkersunngortitsisut tunngavilersuutaannut sunniuteqarput
Siumup kissaataa Kalaallit nunaannik ataqqinninnermik takutitsinissaq aamma nunatsinnit kissatigineqartoq siunissami namminerisamik tunngaviusumik inatsiseqalernissaq naalakkersuisooqatigiit tunngavilersuutaanni ilaasoq, Doris Jakobsen naalunaarpoq
Folketingemi nutaami Socialdemokratit aamma Siumut suleqatigiinnerat naammassisaqarfiulereerpoq. Taassuma qaavatigut naalakkersuisooqatigiinnissamik tunngavilersuut ullumi saqqummiunneqartoq sunniuteqarfigilereerparput, Doris Jakobsen nalunaarpoq.
Danmarkimi aningaasaqarnermut ministerinngortup Bjarne Corydonip ippassarli Doris Jakobsen, Siumut naalakkersuisooqatigiinnissamik isumaqatigiissut pillugu ilisimatereerpaa, taassuma erseqqissaatigaa naalakkersuisooqatigiit Socialdemokratinit aqunneqartut Issittoq pillugu annerusumik suliniarnissaq aallartisassagaat soorlu Socialdemokratit aamma Siumup suleqatigiinnissamik isumaqagiissusiaanni anguniagassatut allassimareersoq.
- Nuannaajallaatigisorujussuuara Socialdemokratinik suleqateqarnitta angusaqarfioreernera. Naalakkersuisooqatigiinnissamik isumaqatigiissummi tunngavilersuut arlallit ilisarisinnaavakkka, nammineq anguniagassatut sulissutiginikuugakkit, Doris Jakobsen oqarpoq.
- Assersuutigalugu partiimi siulittaasup tullia Nicolai Wammen suleqatigilluartorujussuuara, uagullu sunniuteqarsinnaanerput uppernarsarneqassaaq, S'ikkut siuttuata tullia Bjarne Corydon allaffinnut iserluni isumaqatigiissut pillugu iluamik paasitinneqarsimanersugut qulakkeeriartorsinnaammagu, allat suli takunngikkaat, Doris Jakobsen oqarpoq takusinnaanerarlugulu Socialdemokratinik suleqateqarneq Kalaallit Nunaannut iluaqqutaalereersoq.
Danmarkimi Naalakkersuisut siuliinut naapertuullugit maanna naalakkersuisunngortut Issittoq oqaluuserinerumavaat. Danmarkimi naalakkersuisunngortut S'imik siuttoqartut Issittoq pillugu Siunnersuisoqatigiit aamma arctic Five pillugu sulianik annertusaaniarput. Uani pingaaruteqarpoq tikkuassallugu Siumup kissaataa Kalaallit nunaannik ataqqinninnermik takutitsinissaq aamma nunatsinnit kissatigineqartoq siunissami namminerisamik tunngaviusumik inatsiseqalernissaq naalakkersuisooqatigiit tunngavilersuutaanni ilaasoq, Doris Jakobsen naalunaarpoq
Taamatuttaaq naalakkersuisunngortitsisut kissaatigaat naalagaaffeqatigiiffiup pisinnaatitaaffiisa iluani suleqatigiinneq ataqatigiinnerlu inerisarneqaqqissasut, soorlu Kalaallit Nunaata Danmarkimik suleqateqaannaraluarluni namminiilivinnissamik kissaataa naammassiniarlugu suleqatigiittoqassasoq, Doris Jakobsen nassuiaavoq.
Tassunga tunngatillugu Doris Jakobsen oqarpoq:
Siumut eqqarsaatigalugu naalakkersuisunngortut nutaat iluaqqutaaginnassapput maanilu S'inik suleqateqarneq nukittorsaannassavaa. Maanna sulisussanngorpugut issittoq pillugu politikki qulakkeertariaqarpoq Kalaallit Nunaatalu namminerisamik tunngaviusumik inatsiseqalernissaa suliniutigisariaqarpoq. Tamakku suliarinissaat qilanaaraagut, Doris Jakobsen naggasiivoq.