Siumup Pallep pilersaarutaa tutsuiginartinngilaa
Piginneqatigiiffik isertugaq 25 million kronilerlugu tuniniarneqarpoq
Ataasinngorpat ualikkut Siumup naalakkersuisut 2011-mut aningaasanut inatsisissatut siunersuutaat akerleralugu taasissapput. Partiimi aningaasaqarnermut ataatsimiititaliami ilaasortat Finn Karlsenip aamma Per Berthelsenip aningaasanut inatsisissap 12.792.000 kroninik (Nukissiorfiit erngup nukilirfiliornissamut attartugai peerlugit) sinneqartoorluni naatsorsorneqarnera upperinngilaat.
Aningaasaqarnermut naalakkersuisoq Palle Christiansen Demokraatineersoq siunenrsuutip pingajussaaneerneqarnissaanut 65 million kroninik nassaarsimavoq, taamaalilluni amigartoortoqarani.
25 million kronit tassaapput namminersorlutik oqartussat piginneqatigiiffiissa tunineratigut pissarsiassaat, piginneqatigiiffinnullu inatsimmi avammut nalunaarutiginninnginnissamik piumasaqaatit pisussamillu isumaqatigiinniarneq peqqutigalugit Palle Christiansenip oqaatigisinnaanngikkallarpaa piginneqatigiiffik suna pineqarnersoq.
– Tunngaviatigut isumaqatigaarput pisortat suliffeqarfiisa namminersortunngorsarnissaat, isertuasoqarneratigulli upperinngilarput 25 million kronit nalinganut pisisussaqartoq, Per Berthelsen aamma Finn Karlsen oqarput.
Niuernerit allat
Palle Christiansenip 40 million kronit attartortuniit piginnittumut aaqqissuussinermik taaneqartartoq sukkanerusumik ingerlatilerniarpaa, tamannali aamma Siumumiit tutsuiginartinneqanngilaq.
– Aningaasaqarnikkut ajornartorsiorneq suli taamaatinngilaq, paasiuminaapporlu sooq tassanngaannaq qaammatialuit ingerlanerinnaanni pisortat inissiaataasa tunineqarsinnaanerat annertusipiloorsimassanersoq, Per Berthelsen aamma Finn Karlsen oqarput.
Inuit Ataqatigiit, Demokraatit Kattusseqatigiillu Partiiat aningaasanut inatsit akuersaarlugu taasissapput, Siumut akerliulluni taasisoq, maannakkorpiarlu Atassutip siulittaasumik Gerhardt Petersenip isummernissaa eqqartorpaa, taanna Nuuliarpoq ukiaanerani Inatsisartut ataatsimiinnerat naammassiartorlugu.