Siumup siulittaasua: - Kujallermi Siumoqarfissuaq partiimit annaavarput
Siumup siulittaasuata, Erik Jensenip avaqqutaarinani nassuerutigaa, Kommune Kujallermi partii sinnerlugu qinikkat ataqqisaalluartut marlunnik ilanngaqqimmata annaasaq annertuujusoq.
Nunatta Kujataani Siumut - ataatsimut isigalugu - piffissap ingerlanerani nukittuumik inissisimajuaannarnikuuvoq, tamannali kipitinneqarpoq kommunalbestyrelsimut qinersinermi kingullermi, tassanimi qinersisartut aalajangerput IA kommunimi siuttunngortinneqassasoq.
2021-mi kommunalbestyrelsimut qinersinermi Siumut qinersisartunit annikigisassaanngitsumik tununneqarpoq. Qinersinermi tassani partii 15,7 procenterujussuarnik appariaateqarpoq (1.365/2021 sanilliullugu 1.924/2017) illuatungaanilu partii unammisatoqaa IA ajugaarujussuartinneqarluni, partii taanna 17,4 procentimik siuariarami (1.726/2021 sanilliullugu 1.152/2017).
Taamanili partiip Kujallermi aqqut ataasinnaaq aqqutigaa, tassalu ammut. Tassunga nassuiaatissaaqqooqaaq partiip qitiusumik inissisimaleqqinnissani sulissutiginagu, sumiiffimmi qinikkat akunnerminni isumaqatigiinngittualersimanerat pissutaalluni ataatsimoorluarneq aammalu kommune pillugu politikkikkut anguniagaqatigiinnissaq isumaqatigiissutigineqarsinnaajunnaarsimagami, tamannalu partiimut annaasaqaataavoq annertoorujussuarmik, qinigaaffilluunniit suli naanngitsoq.
Atassut sinnerlugu qinigaasoq Kim Ezekiassen (95 -nik qinersisilik) Nanortalimmeersoq qinigaaffik ingerlalereersoq Atassut tunullugu Siumumut nuukkaluarpoq taamaalillutillu Siumut sinnerlugu qinikkat amerliallakkaluarput, tamannali annertunerusumik iluaqutaasimarpasinngilaq.
Tassami kommunalbestyrelsimut qinersereernerup kingorna qinigaaffik sivitsorianngitsoq partii sinnerlugu kommunalbestyrelsimi ilaasortaq, Margrethe Thaarup Andersen (158-nik taaguunnilik) aalajangerpoq partii qimanniarlugu, maannalu tassa partiip qinigaatitaanerpaami ilai marluk annaavai, tassa borgmesteriusimasoq, Simon Simonsen (229-nik qinersisilik) aammalu Karen Marie Kyed Frederiksen (101-nik qinersisilik).
Jensen nassuerpoq: - Partiip kattuffianit sivitsortumik ikiuunniarsarigaluarpugut
Ukioq ilivitsup missaani Kujallermi partiip immikkoortortaqarfiata ajornartorsiornerani partiip kattuffianit ikiuiniartoqaraluarpoq, aporaassutaasut qaangerneqarsinnaaqqullugit suleqatigiinnerlu nukittorsarneqaqqeqqullugu, Sermitsiaq.AG-mut taamak oqaluttuarpoq Erik Jensen:
- Soorunami assorsuaq ajuusaarutigaara sumiiffimmi politikerit taamak nukittutigalutillu sunniuteqarsinnaatigisut annaagatsigit, uagulli Siumup qitiusoqarfianit Siumut Kujalleq ajornartorsiorneranit aniguisinnaaqqullugu ukiup ilivitsup missaanik sivisussusilimmik sapinngisarput tamaat ikiuunniaraluarpugut. Allatut iliorsinnaanngilagut, tusaatissatut tiguinnartariaqarparput qinikkat taakku marluk partii qimassallugu aalajangermata. Pisumi matumani tuppallersaataasinnaasutuatut isigisinnaasara tassaavoq, taakku partiitsinnik qimatsissallutik aalajangertut sumiiffimmi aaqqiagiinngittoqarnera aallaavigimmassuk, nunali tamakkerlugu politikkimik ingerlatsinerput aninerminnut tunngaviginngimmassuk. Tamatuma ilutigisaanik aamma erseqqissaatigissavara kommunalbestyrelsit sinnerini aammalu Inatsisartuni gruppemi suleqatigiinnerput assut pitsaammat aammalu ataatsimoornerput nukittuujummat.
- Kommunalbestyrelsimut qinerseqqinnissap tungaanut ukioq ataaseq sinnilaarlugu piareersarnissamut periarfissaqarpugut, neriuutigaaralu nunap immikkoortuani partiip immikkooortortaqarfiata ilumini ajornartorsiuteqarnini qaangerlugu siunissaq pilersaarusiorfigisinnaanngungajalersimassagaat aammalu minnerunngitsumik ataatsimoorluni peqatigiinneq qinersinissaq tulleq nallertinnagu atuutileqqikkumaartoq, uagut partiip qitiusoqarfianiit nangittumik tapersersuillutalu ikiuunnissatsinnut piareersimavugut ajornartorsiutiminnik qaangiiniarneranni, siunertaassaarmi qinersinissap tullianut Kujallermi sapinngisamik annerpaamik sunniuteqaqqilernissaat, Erik Jensen Sermitsiaq.AG-mut oqarpoq.