Siumut 200 millioninik pissaqartitsinerarpoq
Partiip kalaalimerngit naatitallu akii affaannanngortillugit akikilliniarpai
Aningaasaqarnermut Naalakkersuisoq Aleqa Hammond, Siumut, aningaasanut 2008-mut inatsisissamut siunnersuuteqarpoq 100 millioner koruuninik amigartoorfiusumik.
Siumut inatsisartuni ilaasortaatitaannit tapersersorneqalerpoq.
Partiip politikikkut oqaaseqartuata Lars-Emil Johansenip 100 millioner koruuniinaanngisut 200 millioner korunilli piareersimasuutigissallugit saqqummiuppai.
- Siumup nioqqutissat ilaat akitsuuseqartinnerullugit piniarpai, Lars-Emil Johansen oqarpoq.
- Akitsuutit 100 millioner koruunit kisimik landskarsimut nakkartinneqassanngillat, inuilli aamma peqqissuulernerulernissaannut iluaqutaassapput.
Siumup suut akitsuusissallugit takorloorutiginerai eqqoriarneqarsinnaannguatsiarpoq, tupamut, imigassanut sukkunullu akitsuutit suli akitsuuteqartinneqalissasut.
Aalisakkat pisassiissutigineqartut kiilumut 1 koruunimik akitsuuteqartalernissaat Siumumit atuutsilersinniarneqarpoq, aalisakkat raajallu kilisaatini fabrikkitalinni pisarineqartut akitsuusilersorneqartassallutik, taakku nalingi 81 millioner koruunit landskarsimut nakkartinneqartassallutik.
Lars-Emil Johansenip 200 millioner koruunit sumut atussallugit inissereerpai:
Kalaalermerngit naatitallu akikillineqassapput affaannarmik akeqalissallutik. Kallerup innerata assigiimmik akeqartikkunnaarnerata kingunerisaanik akiliinerusalersimasut akikinnerusumik akiliuteqartalissapput. Avinngarusuni angallanneq naammaginartunngortinneqassasoq. Ilaqutariit ilinniartut pitsaanerusunik najugaqartinneqartalissapput. Atornerluisut pitsaanerusumik katsorsartinneqartalernissaat sulissutigineqassasoq. Lars-Emil Johansenip partiip aningaasanut inatsisissatut siunnersuutip siullermeerutaasumik oktobarip 2-ani oqaluuserineqarnissanut paartii saqqummiussassaqartillugu ilimasaarivoq.