asanninneq navianartoq
Siumut: Aappariit suliffeqarfinni takussaapput
Inatsisartunut ilaasortap, Nikolaj Jeremiassenip (S), Namminersorlutik Oqartussat suliffeqarfiutaanni aappariittoqarneranut malittarisassanik ujartuivoq
Suliffeqarfimmi aappariit suleqatigiillutik suleqatigiiginnartut pillutik suliffimminnik paarsisinnaappat?
Apeqqut tamanna oqallisigineqakkajuttarpoq - ingammik suliffeqarfinni kantiinani - maanna Inatsisartunut ilaasortap Nikolaj Jeremiassenip Siumumeersup, apeqqut Naalakkersuisunut apeqqutigaa.
Tassami Namminersorlutik Oqartussat suliffeqarfiutaanni sulisut akornanni pissutsit eqqortuunersut Nikolaj Jeremiassenip ernumassutigaa.
- Suliffeqarfik pisortat pigisaat taamatut aappariit qullersaalersillugit namminneq pigisamittut aqutsisoqalersarnerani ilaatigut sulisut pikkorissut annaaneqartarnerat nunatsinni takornartaanngilaq, taamaattumik paaserusuppara taamaattoqartillugu sulisoqarnermut piumasaqaatit suut atorneqartarnersut, politkeri Siumumersoq Naalakkersuisunut taama nassuiaavoq.
Quliusunit qulingiluat aappariinnut malittarisassaqarput
Suliffeqarfinni aappariit suleqatigiit pillugit malittarisassanik allaqqasoqartarnera nunani amerlasuuni maanna takussaasorujussuanngoreerpoq.
Atuaruk: Suleqatit imigassarsunnippa?
Dansk HR-imi (sulisoqarnermut tunngatillugu ilisimasoqarfik) siulittaasup, Kim Staack Nielsenip, danskit suliffeqarfiini 1000-iusut 90 procentii suliffeqarfimmi aappariinnut malittarisassiortoqarsimanera eqqoriarpaa, tassa aappariinnermut politikkinik taaneqartartut.
Aappariinnermi ''soraarstaasinnaasoq''
Suliffeqarfinnut avatangiisinut ilisimasanik siammarteriviata misissuinerani tamanna takuneqarsinnaavoq.
Sulisoq suleqatiminik aappaqalersimaguni aqutsisunik oqaluttuutissagaa inatsisit ilaatigut imarisinnaavaat, kisianni aamma suliffeqarfiup sulisoq pisortamik aappaqalersimappat allamut nuutsissinnaaneranik malittarisaqarsinnaavoq, ajornerpaamillu; suliffik allamik taarsertariaqarneranik piumaffigineqarsinnaapput.
Affaat aappariinnermi ajornartorsiortartut
Misissuinermut atatillugu atuagassiami Arbejdsmiljømi saqqummiunneqarpoq, sulisut peqataasut affaat suleqatiminnik aappaqarsimasut, minnerpaamillu taama amerlatigisut sulifimmi aappariinneq aaqqiagiinnginnermik pilersitsisartoq.
Sisamararterutaasa suleqatertik aappariinneq imaluunniit sammisaqarneq pissutigalugu nuutsinneqarsimasoq soraarsitaasimasorluunniit naammattoortarsimavaat.
Pisortat aappatik salliutittarpaat
Suleqatigiilluni aappariinnermut tunngatillugu aaqqiagiinnginnerit pilersartut oqaatissuaanermut, tujorminartumik pissusilersornermut aamma suleqatigiinniarnermi ajornartorsiornermut tunnganerusartut misissuinerup takutippaa.
Pisortap sulisitani aapparilerpagu, 63 procentiisa aamma immikkoortitsinermik ajornartorsiuteqartoqalersarnera oqaatigaat.