Siumut akuersiinnarpoq
Siumup akueraa Inatsisartut immikkut ittumik ataatsimiigiartinneqarnissaannik partiip kissaataa amerlanerussuteqannginneq tunngavigalugu ingerlanneqarsinnaanngitsoq
Tunniutiinnarpugut
- Inatsisartut immikkut ataatsimiisinneqarnissaannik kissaaterput, Inatsisartut suleriaasianni paragraf 38, stk 3, naapertorlugu Inatsisartut siulittaasoqarfiannit itigartinneqarpoq.
- Demokratiskimik aqutseriaammi periutsit ataqqivagut amerlanerussuteqartut aalaajangiinerat ataqqillugu.
Siumut-siuilittaasua Aleqa Hammond taama oqarpoq, Inatsisartuni partiip ilaasortaatitai sinnerlugit.
Tamanna tunngaveqarpoq Inatsisartut siulittaasuata Josef Motzfeldtip, Inatsisartut immikkut aggersarneqarnissaat akuersaanngimmagu naak Siumup aatsitassaqarnermik inatsimmik oqaluuserinninniaraluartoq.
Inatsisartut siulittaasoqarfiannit akuersaarneqanngillat
Inatsisartut suleriaasiat paragraf 38, stk. 3 naapertorlugu makku atuupput:
"Inatsisartut Siulittaasuata pisariaqartileraangagu imaluunniit Naalakkersuisut Siulittaasuata piumasarigaangagu Inatsisartunulluunniit ilaasortat ikinnerpaamik affaasa piumasarigaangassuk Inatsisartut piffissaagallartillugu sioqqutsisumik nalunaarfigineqareernertik tunngavigalugu immikkut ittumik ataatsimiittassapput. Immikkut ittumik ataatsimiinnerni suliassat immikkut ittumik ataatsimiigiaqqusinermut tunngavigineqartut kisimik Inatsisartuni oqaluuserineqartassapput.”
- Suleriaaseq naapertorlugu siulittaasup kisimiilluni aalajangersinnaavaa aggersaasoqassanersoq. Inatsisartut Siulittaasuata siulittaasoqarfimmi ilaasortat massumunnga tunngasumik siammasinnerusumik oqallisiginninnissamut aggersarneqarput.
- Tamanna tunuliaqutaralugu paasinarsivoq Inatsisartuni amerlanerussuteqartut siunnersuummut isumaqataanngitsut, Josef Motzfeldt oqarpoq.