Siumut Demokraatit pisuutikkaat
Demokraatit pisuupput kommunimut qinersinissamut partiinut tapiisoqannginnera, Siumut unnerluutaat taama nipeqarpoq
Demokraatit soqutiginngilaat nunaqarfinni kommunimut qineqqusaartoqarnissaa.
Kommunimut qinersinissamut partiinut tapiisoqannginnera pillugu Siumut nalunaaruteqarpoq.
Demokraatit kommunimut tapiisoqannginnissaa qinnutiginngilaat. Partiit tamarmiullutik isumaqatigiittussaagaluarput tapiisoqarnissaa akuersaarlugu, Demokraatilli taaseqataanngimmata tapiisoqarnissaa piviusunngunngilaq.
Taamaasisoqarnera Siumumit ernumassutigineqarpoq, tassami illoqarfinnit nunaqarfinnut qineqqusaarnissat pinngitsoorsinnaammata. Jens Emmanuelsen Siumut tunuliaqutaralugu kommunimut qinigassanngortittup tamanna uggornartoqartippaa.
Oqartussaaqataanermut tunngavoq
- Innuttaasut tamarmik politikeriutitaminnik naapiisariaqartut isumaqarpunga. Tamanna tamat oqartussaaqataaneranni pisinnaatitaaffiusariaqarpoq, tusarneqarnissarmi kisimi naammanngilaq, politikerilli namminneq isitik atorlugit suliarisartakkaminnik aamma takunninnissamut periarfissinneqartariaqarput, Jens Emmanuelsen oqarpoq.
Taamatuttaaq Siumup Qaanaami qinigassanngortitaata Mads-Ole Kristiansenip politikerit qaqutikkuinnaq takkuttarnerat misigaa.
- Soorunami partiit Inatsisartunut qinersinissaq pingaarnerutippaat, taamaammallu kommunimut nunaqarfinnilu aqutsisunut qinersinissaq tunulliullugu, massakkulli siullermeerluta kommunerujussuarnut qinersisussaavugut. Kommunitoqqanit pinngitsoorani qinigaasoqartarnissaa qulakkeerneqarunnaarnikuuvoq. Taamaammat kommunimut qinigassanngortittut qinersivik tamakkerlugu angalasinnaanerat immikkut pisariaqartinneqarpoq. Tamannali Demokraatit soqutiginngilluinnarpaat maanimi qinigaatitaqarnavianngivipput, Mads-Ole Kristiansen oqarpoq.