Siumut-Ilulissat IA anisippaa
Siumup kommunalbestyrelsimi suleqatigiinnissamik Kattusseqatigiit isumaqatigiinniarfigilerpaa.
IA-p kommunalbestyrelsimi ilaasortaatitaasa, borgmesterip tulliata siulliup isumaginninnermullu ataatsimiititaliami siulittaasup Bent B. Kristiansenip aamma teknikkimut ataatsimiititaliami siulittaasup Jens Madsenip suleqatigiinnissamik isumaqatigiissummik malinninnginnerat Siumup qatsupaa. Taamatut oqarpoq Siumup siulittaasua Edvard Geisler.
Tusagassiorfinnut nalunaarutikkut Edvard Geislerip kommunalbestyrelsimilu gruppeformandip Hans Eriksenip IA isornartorsiorpaat kommunalbestyrelsimi Siumup ilaasortaatitaanut kanngunartumik iliuuseqarnerarlugit.
- Ammut isiginnittumik oqaluuttarpaat sianiitsutullu atorsinnaanngitsutullu taagorlugit, Edvard Geisler sermitsiaq.gl-imut oqarpoq.
Politikkikkulli aaqqiagiinngitsoqarami?
- Aap, assersuutigalugu utoqqarnut, siusinaartumik utoqqalinersialinnut pisortanillu ikiorsiiffigineqartunut allanut kiassarnermut tapiissutit tunniunneqarnissaa IA-p unitsissimavaat, soorluttaaq Saqqami suliniiutinut atugassarisat atorneqarsimanngitsut, IA-p unitsitaanik.
Qanoq isilluni ilaasortat marluk ikinnerussuteqartut politikkikkut suliniutit unitsissinnaamagikkit?
- Siumut ilumoortuusimavoq suleqatigiinnissamillu isumaqatigiissut malinniarlugu tunniutiinnartarsimalluni, maannali peqataaqqikkumajunnaarpugut, Edvard Geisler oqarpoq.
Kattusseqatigiit Partiiannik, kommunimi borgmesteriussutsimik tigumminnittumik, isumaqatigiinniarnerit nalunaaqutaq 11.30 aallartinneqassapput.
Ilulissani IA oqaaseqartissinnaasimanngilarput.