Siumut: Kommunimi pisortaq tatiginngilarput

Kommuneqarfik Sermersuumi Siumup partiimi gruppia arfineq-marlunnik inuttaqartoq maanna ingerlatsivimmi atorfilittani qaffasinnerpaaq toqqaannartumik oqariartuuteqarfigaat: tassa kommunimi pisortaaneq Lars Møller-Sørensen.

Tusagassiuutinut nalunaarut aqqutigalugu Siumumi gruppip siulittaasuata, Peter Davidsenip, kommunimi pisortaanermut tatiginnikkunnaarnertik ilisimatitsissutigaa.

Partiimi gruppip arfineq-marlunnik inuttaqartup Lars Møller-Sørensenimut sooq tatiginnikkunnaarsimanertik pillugu, Peter Davidsen tunngavilersuutinik tallimanik saqqummiussaqarpoq.

Isornartorsiutit tallimat:

1. 2014-mi Kommuneqarfik Sermersooq sukannersumik nakkutigineqarnerata kingunerisaanik naatsersuutit Aningaasaqarnermut Inuussutissalerinermutllu Ataatsimiitsitaliamut qaammammoortumik aamma kvartalikkaartumik (qaammatit pingasukkaartumik) kommunalbestyrelsimut saqqummiunneqartarnissaat piumasaqaataavoq. Ajoraluartumik piffissami sivitsortumi tamanna eqqortinneqanngilaq, tamannalu akueriinnarnianngilarput ernumanartutut isigigatsigut.
2. Tasiilami pissutinut, DR2-milu aallakaatitassiamut tunngatillugu pisortaaneq ilisimasaqaraluarluni siusinaartumik borgmesterimut kommunalbestyrelsimullu iliuuseqarnissamik siunnersuisimannginnera borgmesteriusimasumut annertuummik kingunerluppoq. Tassami pisortaaneq tassaasariaqaraluarpoq kommunetsinni ulluinnarni aqutsinermi borgmesterimut kommunalbestyrelsimullu pissutsit erloqinarsinnginnerini siusinaarluni pitsaanerpaamik siunnersuisussaagaluaq! ”Erseqqissaat, DR2-mi aallakaatitassiamut tunngatillugu uagut illuatungiliuttut ilisimatinneqarnikuunngisaannarpugut.” Ulloq manna tikillugu suli aallakaatitassiamut tunngatiullugu kommunemi eqqartueqatigiittoqanngilaq – naak tamanna piumasinikuugaluaripput.
3. Tuujummi sanaartornerup uninngasimaneranut atatillugu piarinaatsoornerinnakkut paasivarput aningaasarpassuarnik nalilimmik isumaqatigiittoqarsimasoq ataatsimiitsitaliaq susassaqartoq aamma Aningaasaqarnermut Inuussutissalerinermullu Ataatsimiitsitaliaq avaqqutiinnarlugu. Tamanna apeqquteqaateqarnikkut uteriisernikkullu paasivarput, naak nalinginnaasussaagaluartoq aningaanut attuumassutillit minnerpaamik Aningaasaqarnermut Inuussutissalerinermullu Ataatsimiitsitaliamut ilisimatitsissutigineqartarnissaat. Tamanna eqqarsarnartoqarpoq, suummita allat nalusagut kommunalbestyrelse avaqqullugu aalajangiiffigineqarsimappat?
4. Apeqquteqaatit ilaasa ullut 14-it iluinni akisassat ujartuiffigeqqaarlugit akineqartarneri ernumanartutut isigaagut, Tuujummut, NAIP illuutaanut tunngasut assersuutissaqqipput. NAIP-ip illuutaanut tunngatillugu suliap ingerlanera pineqartuniit ernumatigineqarnera eqqarsarnartoqartipparput, ammasumik suleriaaserqarneq taamaattussaava?
5. Kommunep IT-mi immikkoortortaqarfia avammut sullissisussarsiuunneqalermat sipaaruteqarnissarput saqqummiunneqarpoq. Maannakkulli killormorluinnaq pisoqarpoq IT-mut aningaasartuutigut annertuseriarujussuarput aamma IT-mut tunngatillugu suliniutit (projektit) aningaasanik nalillit aqunneqanngitsunut tunngatillugu illuatungiliuttuniit ukioq piumasaraarput tamakku suliniutit aqunneqarnissaat.

Borgmesteri ilanngunneqarpoq

Apeqqutip ”borgmesteri kommmunalbestyrelsi avaqqullugu allaffissornikkut aningaasanik nalilinnik aalajangiisinnaanermut pisinnaatitsissumik tunniussaqarsimanersoq” akissuteqarfigineqarnissaanut tunngatillugu Peter Davidsenip aamma IA-mit borgmesteri Charlotte Ludvigsen ilannguppaa.

Politikkikkut aqutsinerup allaffissornikkut tutsuiginartumik malinneqarnissaa qanoq borgmesterinngortup qulakkeerniarneraa, taassuma aamma akissutissarsiffigerusuppaa.

Pisortaq oqassaanngitsoq

Sermitsiaq.AG-p Lars Møller-Sørensen isornartorsiuinermut qanoq isummernersoq aperaa. Kommunimi pisortaaneq tamanna ima akissuteqarfigaa:

- Oqaaseqarfiginianngilara.

Nutaarsiassat

Tasiilami anorersuarnissaanik aarlerisaarut

DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...

Snow Fest-imi iluatsilluartumi nutaaliorsinnaaneq nuannaarutigineqarpoq

Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...