Siumut: Kukkunersiuinermut ataatsimiititaliaq suli ataatsimiinngilaq
Ataatsimiititaliani ilaasortat Inatsisartunit toqqarneqareernermi kinguninnguatigut inissitsiterlutik ataatsimiittaraluarput, Kristian Jerimiassen, Siumut, tikkuaavoq
Inatsisartuni toqqissisimannginneq suli ingerlavo, ingammik Siumup aamma IA-p akornanni akerleriinnerat. Maannakkut Kristian Jerimiassen Siumut sinnerlugu Inatsisartuni ilaasortaq, Inatsisartut siulittaasoqarfianut aalagaqaateqarpoq kukkunersiuinermut ataatsimiititaliaq suli ataatsimiissimanngitsoq, siulittaasoqarfillu qinnuigalugu kukkunersiuinermut ataatsimiitaliap sulinerata unittuunnginnisaanik qulakkeerinnissasoq.
- Inatsisartut upernaakkut ataatsimiinnerput aallarnerlugu 1. Marts 2011 inatsisartut kukkunersiuinermut ataatsimiititaliaani ilaasortassat partiit toqqarpaat. Ullorli manna tikillugu kukkunersiuinermut ataatsimiititaliaq inissitsiterluni suli ataatsimiinngilaq naak nalinginnaasumik inatsisartut ataatsimiittarfiani toqqaareernerup kinguninngua inissitsitsiterluni ataatsimiittoqartaraluartoq. Inatsisartut ataatsimiititaliaat pingaartinneqarluni akisussaaffimmillu annertuumik pigisalik taamatut sulitinneqassanngitsoq Inatsisartut siulittaasoqarfiata qularnaartariaqarpaa, Kristian Jerimiassen allappoq.
- Inatsisartummi kukkunersiuinermut ataatsimiititaliaat tassaassanngilaq ataatsimiititaliatut taajuutaannaq tassaassallunili ataatsimiititaliaq suliaminik pimoorussusioq aallussisorlu. Ataatsimiititaliami sulinerup unitsinneqqinnera kukkunersiuinermut ataatsimiititaliamut pimoorussilluni suliniarnermut tulluartuunngilaq, kingullermillu isumaliutissiissutip suliarinerani ataatsimiititaliami ilaasortatut sulinerup pingaartinneqarnissaa piumasarinikuuvara maannakkullu kingumut ataatsimiititaliami sulinermik pingaartitsinani sulineq aallarteqqippoq, allakkamini allappoq.
- Ataatsimiititaliami sulianik ingerlasoqarpoq inatsisartullu ataatsimiinnerat aallartereerpoq aamma ataatsimiititaliaq inissitsitsertariaqarpoq suliat ingerlasut nakkutiginissaat pisariaqarmat. Maannakkut piumasarivara siulittaasoqarfiup naammassissangaa inatsisartut kukkunersiunermut ataatsimiititaliaat inissitsiterluni ataatsimiissasoq, Kristian Jerimiassen naggasiivoq.
Naaja Nathanielsen Aningaasaqarnermut Ataatsimiititaliamit ilaasortaajunnaarluni Kukkunersiuinermut ataatsimiititaliamut 1. marsi 2011 siulittaasutut toqqarneqarpoq.