Siumut: Qeqertarsuarmi qatserisartut upalungaarsimasinnaanerat killeqartoq
Qeqertarsuarmi biilit qatserutit minutserpaaluit kissasseqqaarlutik ingerlarsinnaapput. Ikuallattoqartillugu qatserisartut minutserpaalunnik annaasaqarsinnaapput.

Qeqertarsuarmi upalungaarsimaneq pitsaanerusinnaavoq. Qeqertarsuarmi Siumumi siulittaasoq Laarseeraq Berthelsen, kommunalbestyrelsemi ilaasortaq Karl Thue Nathansen aamma allatsi Ove Berthelsen taama isumaqarput.
Politikerit pingasut Kommune Qeqertalimmi kommunalbestyrelsemi ilaasortanut tamanut ammasunik allagaqarlutik pitsanngorsaasoqarnissaanik piumasaqarput.
- Qeqertarsuup qatserutaasiviata maannakkut pumpeq ataasiinnaq isumalluutigaa, piffissartornarsinnaasoq taamaallaat immamiit pumperinermut atorneqarsinnaagami. Biilersuit qatserutit imaaliallaannaq aallarsinnaanngillat minutserpaaluit kissasseqqaagassanngorsimagamik, aammattaaq biilersuit pumpiat mianersuuteqqissaangassanngorsimavoq, politikerit pissutsit oqaluttuaralugit allapput.
Nunatta naatsorsueqqissaartarfia naapertorlugu illoqarfik 800-t sinnerlugit innuttaasoqarpoq.
Aaqqiisoqarnissaa pisariaqarluinnarpoq
Siumumi ilaasortat naapertorlugit biilit qatserutit taarserneqarnissaat 2026-imi pissasoq aalajangerneqarsimavoq. Qatserutit biilit nutaanngililerlutik atorsinnaanerisa killeqalernerat 2019-imili maluginiarneqarsimavoq.
Qeqertarsuarmi Siumumi ilaasortat pingasut isumaqarput piaartumik iluarsiisoqartariaqartoq, inuunermik naleqartoqannginnerani.
- Kialluunniit takorloorsinnaavaa taamatut qatserinermut atortulutsigaluni illumut ikuallattumut iserterneq qatserisartut inuunerinik navianartorsiortitsinerummat. Ajornerpaamillu pisoqassagaluarpat pisuutinneqartussaq ataasiinnaavoq, tassalu kommunalbestyrelsi, pineqartumi sipaarniuteqarnissamik aalajangiisimasoq, allapput.
Allakkat ammasut borgmester borgmester Ane Hansenimut (IA) Qeqertarsuarmi bychef Benedikte Mølgaardimut kommunalbestyrelsemilu ilaasortanut tamanut nassiunneqarsimapput.