Siumut siulittaasussarsiussaaq
Doris Jakobsen Siumumut siulittaasuugallartussatut toqqagaavoq, partiimut ilaasortat Hans Enoksenip paarlatsissaanik nutaamik qinersereernissaasa tungaanut.
Siumup siulersuisuuneri pingasunngornerup ualikkuani aalajangerput Doris Jakobsen Siumumut siulittaasuugallartussatut qinerniarlugu. Partiimi siuttut aamma aalajangerput siulersuisuunerit inatsisartunut ilaasortanngortut katersuutsissagaat, partii piaarnerpaamik siulittaasortaarniassammat.
Maanna Siumukkormiut eqqartorpaat siulersunngortitsineq immikkut ataatsimeersuarnermi pissanersoq. Apeqqut immikkoortortaqarfinnut tusarniaassutigalugu nassiunneqarpoq.
Partiimut siulittaasuugallartoq Doris Jakobsen oqarpoq siulersuisunngorniarsariniarnani, Aleqa Hammond-ilu toqqarlugu, Siumukkormiuni taaneqarnerpaasoq.
– Aleqa Hammondip qinersinermi taaneqarnera tusaatissatut tiguara, taamaammat siulittaasussatut tulluarnersaalluni, 30-nik ukiulik Doris Jakobsen sermitsiaq.gl-imut oqarpoq.
Siumulli siulittaasorigallagaata siunissami siulittaasunngorniarsinnaanini mattutinngilaa.
Hans Enoksenip tunuarniutini pingasunngornermi tunniuppaa, siulersuisuunerit inatsisartullu gruppiata akuerisaat.