Siumut: Uranisiortoqanngivinnissaa sinnattuaqineruvoq
Uran pillugu apeqqummi Demokraatit nakkaannarput.
Naak Inatsisartut ukiaanerani ataatsimiinnerminni ullup kingulliup tulliani pingasunngornermi novembarip 10-ani aatsaat uranisortoqanngivinnissaanik allanilluunni radiup qinngornertalinnik piiaasoqannginnissaanik aalajangiisimaneq ukiunik 22-nik pisoqaassusilik eqqartortussaagaluaraat, taamaattoq taanna pingasunngormat aningaasaqarnermut inatsisissap eqqartornerani tikinneqarpoq.
Partiit illuatungiliuttut Siumut Atassullu isumaqarput siunissami aningaasaqarneq eqqartorneqarsinnaanngitsoq Narsami Kuannersuarni suliffissat isertitassallu ilanngunnagit.
– Nunatsinni pisuussutit januaarip aallaqqaataani akisussaaffigilikkavut atorsinnaassagutsigik uranisiortoqanngivinnissaanik aalajangiineq sinnattuaqinerusoq naalakkersuisooqatigiillu aasaanerani Qoornumi ataatsimiinnerminni suaarutigisaat atorunnaarseqqaartariaqarparput, Per Berthelsen oqarpoq.
– Taama isumaqarneq pisuussaarneruvoq nunattalu kujataani suliffissaaleqiffioqisumi aningaasaqarnikkut ineriartornissamik akimmisaartitsilluni. Uranisortoqanngivinnissaata aalajangiussimaannarnera aatsitassarsiornermik suliassanut arlaqartut akimmisaartitsivoq, aatsitassammi tamangajavimmik uranitaqarput.
Per Berthelsen isumaqarpoq, uranisiortoqanngivinnissaata atorunnaarsinnissaani alloriarneq siulleq tassaassasoq Inatsisartuni aatsitassaqarnermut ataatsimiititaliarmik pilersitsinissaq.
Demokraatiniit Niels Thomsenip nassuerutigaa pariip aatsitassat uranitaqartut piiarnissaat akuersaaraa, naalakkersuisooqatigiinnerulli aqqani nakkaannartariaqarlutik:
– Suleqatigiinnermini tamakku atuagassaritinneqarput. Pilliuteqarlunilu tunniussisoqartarpoq anguniakkap anguneqarnissaanut.
Inuit Ataqatigiinniit Naaja Nathanielsen akerlianik isumaqarpoq, Kalaallit Nunaanni akuerssaartoqanngivinnissaq annertusartariaqartoq:
– Aamma imigassamik atornerluisoqanngivinnissaanik aalajangiisariaqarpugut.