Siunersiuineq: Qarasaasiakkut kukkusoqarsimanera Vittusip nassuerutigaa

- Inatsimmi pingaarnertut imarisat tunngavissiisutut malinneqartutullu Naalakkersuisunit isigineqarpat?

- Inuup 2018-imi soraarnerussutisiaqarnissamut ileqqaagaqanngitsup 2019-imi ileqqaarutigineqarsimanngitsunik akiliuteqarsimanissaa qanoq ilimanartigiva?

- Suliap matuma pissusissamisut ingerlasimannginneranut inuillu pitsaanngitsumik eqqorneqarsimanerannut kina akisussaasuua?

Aningaasaqarnermut naalakkersuisoq Vittus Qujaukitsoq (NQ) aningaasaqarnermut akileraartarnermullu ataatsimiititaliamit siullermeertumik tamanut ammasumik siunersiorneqarnerani apeqqutit 41-sunit pingasut taama allassimapput.

Siunersiuineq akunnerni pingasungajanni ingerlanneqarpoq, apeqqutillu akineqartut akunnerini ataatsimiititaliaq itisiliinerusunik apeqquteqartarnissaminik periarfissamik ammatitsilluni.

- Ajornartorsiutit piunerannit anginerusunngortittariaqanngilagut. Akileraartarnermut uppernarsaatit qarasaasiakkut atortutigut kukkuluttortoqarneranik kukkusamik anillatsinneqarsimapput. Tamannalu soorunami ajuusaarnarpoq, ammasumik siunersiuinermi Vittus Qujaukitsoq oqarpoq.

Qarasaasiakkut kukkuluttorneq

Ammasumik siunersiuinermi ataatsimiititaliami ilaasortat tamarmiusut peqataapput. Ilaasortat pingasut, Múte B. Egede (IA), Karl-Kristian Kruse (S) aamma Malene Vahl Rasmussen (D) ataatsimiittarfimmi peqataapput, Hermann Berthelsen (S), Jens Napaattooq (PN), Henrik Fleischer (S) aamma Peter Olsen (IA) oqarasuaatikkut peqataasut.

Ammasumik siunersiuinermi akissutigineqartut ataatsimiititaliami ilaasortanit naammagisimaarnartutut oqaatigineqarput. Pinngitsaalisamik soraarnerussutisiaqalernissamut ileqqaartoqartalernissaanut tunngatillugu suliaq siuinersiuinermi apeqqarissaarutigineqarpoq.

Innuttaasut katillugit 6628-iusut soraarnerussutisiaqalernissamut ileqqaarsimanngitsut 50 procent tikillugu akileraartinneqartalerput, ilaallu akileraarnermut ilaanngaateqartinneqarunnaarlutik. Ataatsimiititaliami ilaasortat naalakkersuisumit eqqissisarneqarput, innuttaasut 2018-imi ileqqaarutissatut piumasaqaatiminnik naammassinnippata akileraartarnermut uppernarsaammik nutaamik nassitsiffigineqassasut ilisimatitsissutigalugu.

Taakku saniatigut inuit 935-it soraarnerussutisiaqalernissamut ileqqaaruteqarsimagaluartut kukkusumik akileraartarnermut uppernarsaammik nassitsiffigineqarsimapput. Taakkununnga ilaallutik tjenestemanditut atorfeqartut. Siunersiuinermi ilisimatitsissutigineqarpoq Danmarkimi moderniseringsstyrelse suleqatigalugu kukkuluttornerit taakku aaqqinniarneqartut.

Utoqqaat aningaasaateqarnerulernissaat siunertaavoq

Kalaallit Nunaanni innuttaasut pinngitsooratik soraarnerussutisiaqalernissamut ileqqaaruteqartalernissaat Inatsisartut 2016-imi ukiakkut ataatsimiinnerminni amerlanerussuteqangaatsiarlutik akueralugu taasissutigaat. Inatsit malillugu innuttaasut ukiumut isertitatik aallaavigalugit ileqqaarisalissapput.

- Pinngitsoorani soraarnerussutisiaqalernissamut ileqqaaruteqartarnermut inatsit atorunnaarsinneqassappat, kingunerissavaa innuttaasut utoqqalinerminni akissaatikinnerulernissat. Innuttaasut pilersuisussagut siunissami ikiliartortussaapput, taamatullu akileraartarnermi isertitassagut ikiliartortussaallutik. Nammineq soraarnerussutisiaqalernissamut piumasaqarneq aallaaveqarpoq innuttaasut namminneq pilersorsinnaanerannik qulakkeerinninniarluni, Vittus Qujaukitsoq nassuiaavoq.

Misilittakkat suliani atorneqassapput

Jens Napaattuup (PN) pinngitsoorani soraarnerussutisiaqalernissamut ileqqaaruteqartalersitsinermi suliaq ”kusanaatsuliaannaanngitsoq, ajunaarnersuartulli taaneqarsinnaasutut” taavaa. Vittus Qujaukitsulli tamanna utertillugu ima oqaasertalerpaa:

- Inatsisip siunertaa imminermini ajunngilaq. Ikaarsaariarnermiuna systemit assigiinngitsut naammaginartumik aaqqiissuunneqannginnerat taanna aporfinnut ilaasoq. Inatsisip uuma inuit 9.000-it missaat aqqutissiuuppai, naafferartumik ileqqaaruteqarnissamut akiliuteqartanngitsut aqqutissiuunneqarluni, Vittus Qujaukitsoq oqarpoq.

Suliami kukkuluttortoqarsimanera aaqqiissutillu maanna misilittagarineqalertut Ilanngaassiviup akileraartarnermullu ilanngaatip atulersinnerini oqimaalutaaqataassasut, aningaasaqarnermut naalakkersuisup ilanngullugu ilisimatitsissutigaa.