Siunnersuineq qaangerujussuarlugu pisassiinissap ingerlateqqinnissaanut Naalakkersuisut siunnersuuteqarput
Naalakkersuisut aalajangiissappata, qaleralinnut pisassiissutissat 2024-mi ilisimatuussutsikkut siunnersuineq qaangerujussuarlugu aammaarlutik inissinneqassapput.
Sinerissap qanittuani qaleralinniarneq ilisimatuussutsikkut siunnersuinernut naleqqussarneqassasut, maanna Naalakkersuisut taakkulu siulii piffissap ingerlanerani oqariartuuteqartarput. Aalisarneq pillugu Ataatsimiititaliarsuup isumaliutissiissutimini tamanna aamma kaammattuutiginikuuaa.
Naleqqussaanissarlu ukiumik ataatsimik kinguartinneqaqqippoq, Naalakkersuisut tusarniutigiligaanni allakkani tamanna takutinneqarpoq.
Tassanimi pisassiissutit ukioq manna annertussusaannik ingerlateqqinneqassasut siunnersuutigineqarpoq. Aalisarnermut Piniarnermut Naalakkersuisoqarfiup aalisarneq pillugu inatsimmik suliaqarnerup sivisunera ilaatigut tunngavilersuutigaa:
- Taassuma saniatigut aalisarnermut inatsisissamik nutaamik suliaqartoqarpoq. Pitsaasumik aalajaatsumillu suliaq ingerlanneqassappat kiisalu TAC pillugit aalajangiiniarnermi pitsaasumik aaqqiisoqassappat suliap ingerlanerani aalajaatsumik aalisartoqarnissaa pisariaqarpoq, tusarniaanermi allakkani taama allassimasoqarpoq.
Pisassiissutit siunnersuummit pingasoriaammik annertunerusoq
Aqutsiveqarfik Nuummi ilisimatuussutsikkut siunnersuut 522 tonsimiippoq. Pisassiissutit 899 tonsinut inissinneqassasut siunnersuutigineqarpoq.
Aqutsiveqarfik Paamiut-Qaqortoq 770 tonsinik pisassiissuteqarfigineqassasoq siunnersuutigineqarpoq, tassani 220 tonsinik innersuussisoqarsimavoq. Tassa imaappoq, pisassiissutit innersuussutigineqartunit pingasoriaataat sinnilaarlugit amerlanerupput.
Aqutsiveqarfik Uummannami aamma Upernavimmi assingusumik iliortoqarpoq, tassani pisassiissutit ingerlateqqinneqarput, ataani takussutissami takuneqarsinnaavoq. Qeqertarsuup Tunuani pisassiissutit 1.500 tonsinut inissinneqarput.
