Siunnersuut aningaasaleerusulersitsissaaq: Inuussutissarsiornermut kattuffik isumaqataanngilaq

Naalakkersuisut akileraartarnermut inatsimmi nutaamik aaqqiissuteqarnikkut nunatsinni aningaaasaleerusussuseqalersitsiniarpoq. Aaqqiissulli apeqquserneqarlunilu allaffissornerulernissamik ernumassuteqarfigineqarpoq, tusarniaanermut akissutit tamanna takutippaat.

Aaqqiissut nutaaq iluanaarutinut akileraarutip qasukkarneqarnissaanut periarfissaavoq, ilaatigullu ingerlatseqatigiiffinnut aatsitassarsiornerup, erngup nukingata aamma sermip erngullu niuernikkut iluaqutigineqarnissaasa iluanni atuinissamut akuersissutinik pigisaqartunut atuussinnaasoq.

- Pineqartut toqqarneqarnerannut pissutaavoq nunanit allanit aningaasaliisussat aamma immikkut ilisimasat tamakkunatigut inuussutissarsiutinik ineriartortitsinissamut aningaasarsiornerullu pitsanngoriartuinnarnissaanut pingaaruteqarluinnartuunerat, aningaasaqarnermut naalakkersuisoq, Naaja H. Nathanielsen (IA), Inatsisartunut saqqummiussissummini allappoq.

Qasukkarneqarnerata saniatigut maanna akileraartarnermut inatsimmi arlalinnik allannguinissamut Naalakkersuisut siunnersuuteqarput. Siunnersuutit ataatsimoortut ukiaanerani ataatsimiinnermi suliarineqassapput.

Sulisitsisut: Annertusaallunilu allaffissornikkut ajornarnerulersitsineq

Siunnersuulli inuussutissarsiortunit qiimmatsaataanani ernumassutigineqarneruvoq. Sulisitsisut kattuffiata tusarniaarnermut akissummi siunnersuutip kinguartinneqarnissaa siunnersuutigaat, Naalakkersuisullu akerlianik akileraartarnermut aaqqissuusseqqinnissamik aallartitseqquaat:

- GE inassuteqaateqarpoq, ”nammineq isumaqarpoq” malillugu akileraarutinit isertitat 0.00 kriunissaannik kinguneqartumik siunnersuusioraanni peqatigitillugulu akileraaruseriffiup suliakkernerunissaa ilimagineqarluni pisortallu taamaalillutik aningaasartuuteqarnerulerpata taarsiullugu Kalaallit Nunaanni akileraartarnermik aaqqissuusseqqivinneq piareersarneqassasoq.

- Kalaallit Nunaanni akileraartarnermi saniatigut aaqqissuussinerit siunnersuummi amerlanerulersinneqarput, taamaalilluni taakkununnga allaffissornermi suliaqarneq ajornanerulerluni – tamanna inuiaqatigiinnut iluaqutaavissutut isikkoqanngilaq, Sulisitsisut naliliipput.

Grønlandsbanken tusarniaanermut akissuteqarnermini assingusumik oqariartuuteqarpoq, taamatullu aamma Grønlands Revision tusarniaanermut akissummini annertuumi aningaasaliisinnaasut amerlanngitsut Naalakkersuisut siunnersuutaa iluaqutigissagaat oqaatigaat.

Naalakkersuisut attassisut

Siunnersuut ingerlatseqatigiiffinni Kalaallit Nunaata marloqiusamik akileraartarnissamut isumaqatigiissuteqarfigisaannut taamaallaat atuussinnaaneranik tamanna pissuteqarpoq, tassaasut Danmark, Savalimmiut, Norge aamma Island.

Siunnersuutilli Kalaallit Nunaat orniginarsisissagaa aamma aningaasaliiffigissallugu unammillerfiunerulersissagaa, Naalakkersuisut oqaatigaat, siunnersuullu maannamut taamaallaat sulisumik ataatsimik saniatigut Akileraartarnermut Aqutsisoqarfimmi pisariaqartitsissasoq nalilerpaat.

Kalaallit Nunaata marloqiusamik akileraartarneq pillugu nunat isumaqatigiissuteqarfigisai siunissami amerlineqarsinnaasut, Naalakkersuisup oqaatigaa, naak taamatut isumaqatigiissuteqarniartarneq piffissamik atuiffiungaatsiartaraluartoq:

- Kalaallit Nunaata nunanit allanit soqutigineqarnerulernera ilutigalugu nunat allat marloriaammik akileraarnissaq pinngitsoorniarlugu Kalaallit Nunaannut isumaqatigiissuteqarumallutik kissaateqarnissaat naatsorsuutigissavarput, Naaja H. Nathanielsen Inatsisartunut allappoq.