Siunnersuut: Containerit eqqakkannik ikuallaaviusinnaasut atulerlik
Nunaqarfinni eqqagassat anartarfiillu puui ulikkaarsimasut suliarineqarnissaat ajornartorsiutaapput. Avannaata Kommuniani borgmesterip Palle Jerimiassenip tamanna piaartumik aaqqiivigineqarnissaa kissaatigaa.
Avannaani eqqaaviit anartarfiillu puui ulikkaaqqasut sumi tamaaniiginnarneri ajornartorsiutaasut, Avannaata Kommuniani borgmesterip ilisimavaa.
- Aappilattumiinnaanngilaq. Ilisimavara nunaqarfinni illoqarfinnilu eqqakkanik ikuallaaveqanngitsuni igitanik suliaqarniarneq ajornartorsiorfiusartoq, Sermitsiaq.AG-imut oqarpoq.
Sermitsiaq.AG Aappilattumi innuttaasut illut silataanni aqqusernullu eqqaani igitanik anartarfiillu puuinik ulikkaarsimasunik ilioraaginnartalersimanerat sapaatip akunnerani matumani allaaseraa. Igitat suliarineqarnissaannut periarfissalunnerup kingunerisaanik nunaqarfimmi tipi ajornartorsiutaalersimavoq. Nunaqarfimmilu innuttaasut qanoq iliuusissaqanngikkallarput, eqqaavissuarmukaassisartormi trillebøreeqqanik taamaallaat assartuuteqarallarpoq.
Eqqakkalli eqqaavissuarmukaanneqaraluarpataluunniit ikuallannissaannut inerteqquteqarpoq. Taamaammat nunaqarfimmi eqqakkanik katersiinnalersimaneq, nunaqarfinni aqutsisuni siulittaasup, Karl Petersenip, ajornartorsiutitut Sermitsiaq.AG-mut taavaa.
Aaqqiinissamut siunnersuut
- Eqqaamaneqartariaqarpoq kommunerput piniartoqarfissuummat, taamaattumillu aamma qimuttunik qimmeqarfissuulluni. Eqqakkat sumi tamaaniinnarmiinnginnissaat anguniarlugu siunissaq qaninnerusoq ungasinnerusorlu eqqarsaatigalugu aaqqiissuteqartoqartariaqarpoq. Periarfissaassagaluarpat containerit eqqakkanik ikuallaanermut atorsinnaasut atuutsilerusukkaluarpakka, Palle Jerimiassen oqarpoq.
Palle Jerimiassenip oqarnera naapertorlugu containerit mikisut eqqakkanut ikuallaavittut atorsinnaasut Canadami inoqarfinni mikinerusuni atorneqarput. Avannaata Kommunianilu nunaqarfinni eqqakkanik suliaqarnermut taama ittut atulersinnaanerat takorloorsinnaanerarpaa, kommunit tamarmiusut ikuallaavinnik annernik peqalernissaata tungaanut.
Nunaqarfiit illoqarfiillu ikuallaaveqanngitsut eqqakkanik ikuallaaqqusaanngillat, Kalaallit Nunaata EU-p eqqakkanut tunngatillugu malittarisassai malittariaqarmagit. Avannaani nunaqarfiit umiarsuarmik tikittoqarnissaminnik utaqqisariaqartarput, eqqakkat assartorneqarnissaat utaqqillugu. Eqqakkat assartorneqareeraangata illoqarfinni ikuallaavilinni aatsaat ikuallanneqartarput. Ukiuunerani imaq sikuutillugu nunaqarfimmiut eqqakkanik katersiinnartariaqartarput, umiarsuit nunaqarfinnut tulassinnaasanngimmata. Ukiumi katillugit qaammatit arfinillit sikuusarpoq.
Ikuallaaviit kommunit ingerlatassaat ukiut tallimat qulilluunniit qaangiuppata atuutilersussat utaqqiinnarnagit, siunissaq qaninnerusoq eqqarsaatigalugu Naalakkersuisut aaqqiissuteqartariaqartut, Palle Jerimiassen isumaqarpoq.