Ilinniarneq
Siunnersuut: Inuussutissanut tunngasunut amerlanerusut ilinniartalissapput
Inuussutissanik avammut niuerneq annertusissappat, inuussutissanut tunngasunut ilinniarfissanik neqeroorutit amerlanerusariaqarput, Inuit Ataqatigiinneersoq Sara Olsvig siunnersuuteqarpoq
Nunatsinni inuussutissat pillugit ilinniakkat amerlanerusut ilinniarneqarsinnaasariaqarput.
Inuit Ataqatigiit siulittaasuat Sara Olsvig taama siunnersuuteqarpoq, siunnersuullu ullumi marlunngornermi siullermeerneqassaaq.
Ilisimasat annertunerusut
Inuussutissalerinermi ilisimasanik naammassisinnaasanillu annertunerusunik qulakkeerisoqartariaqartoq, Sara Olsvig siunnersuummini erseqqissaavoq.
- Inuili inuussutissalerinermilu ilinniartitaanikkut periarfissat ilaatigut iluaqutigaavut, sulili annertunerusumik iliuuseqartoqartariaqarpoq, siunnersuummini ilaatigut allappoq.
Atuaruk: Kinamiut 30-t tunisassiorfinni sulissapput
Atorluaaneq
- Taamattaarlu ilinniarfissatut periarfissat ilinniaqqiffissatullu periarfissat assigiinngiiarnerulersillugillu pilerinarnerulersittariaqarpavut. Nunatsinni ilinniarfinni arlalinni laboratoriamik atortorissaarutinik pigisaqartoqareerpoq. Taakku atorluarnerullugit procesteknikeritut ilinniartitaanerit fiskeriteknologitulluunniit ilinniartitaanerit saniasigut inuussutissanik nioqqutissiornerup tungaatigut ilnniarfissanik allanik ineriartortitsinissamut atorneqarsinnaapput, IA-mi siulittaasoq oqarpoq.
Naalakkersuisut isumaqataasut
Inuussutissat allat aalisakkanik nioqqutissiornerup saniatigut aamma aallunnaqartariaqartut, Sara Olsvig isumaqarpoq.
- Uumasunut nunamiut miluumasut, qeqqussat, naatitsisinnaanermut periarfissat naatitsiviillu ineriartortinneqassapput, nunatsinnilu piffinnut amerlanerusunut siaruarlugit, nioqqutissianik immikkuullarissunik nunami maani nammineq atugassatsinnik, avammullu nioqqutissatsinnik inerisaasinnaaqqulluta, Sara Olsvig oqarpoq.
IA-p siulittaasuata siunnersuutaa taperserlugu, Naalakkersuisut akissuteqarnerminni allapput.