Siunnersuut: Peqqinnissaqarfiup pisortaa itigartitsisinnaatitaassaaq
Napparsimasup najugaqarfigisaata peqqinnissaqarfiata avataatigut napparsimasoq misissugassanngortinneqassanersoq nakorsarneqassanersorlu aalajangiinermi peqqinnissaqarfiup pisortaa itigartitsisinnaatitaassaaq. Tamanna inatsisissatut siunnersuummi tusarniaassutigineqalersumilu, takuneqarsinnaavoq.
Peqqinnissaqarfiup Tulleriissaarisarnermut Ataatsimiititaliaa pillugu nalunaarut nutarterneqarpoq, " ullutsinnut naleqqussarneqarnissaa piffissamillu matuminnga aallaaveqarnissaa" pillugu, taama Namminersorlutik Oqartussat tusarniaanermi allakkiaminni allapput.
Inatsimmut maannakkumut atuuttumut sanilliullugu allannguut pingaarnerpaasoq tassaavoq, "suliamut tunngatillugu annertuumik mianerisassat tunngavigalugit, tassunga ilanngullugit aningaasaqarnikkut eqqarsaatigisassat annertuut pissutigalugit", tamanna takuneqarsinnaavoq.
Iluarsineqartut arlallit
Nakorsatut ilisimasalittut pitsaanerpaamik misissuinissamut nakorsaanissamulluunniit aningaasaqarnikkut eqqarsaatigisassat oqimaannerulersinnaaneri, napparsimasumut qanoq kinguneqarsinnaanersut, inatsisissatut siunnersuummi takuneqarsinnaanngilaq.
2022-mi oktobarimi, taamanikkut Kalaallit Nunaanni peqqinnissaqarfimmi nakorsaanerusoq, Berit Bjerre Handberg, tusagassiutitigoorpoq, Tulleriiaarisarnermut ataatsimiititaliami siulittaasutut innuttaasup kræfteqartup Rigshospitalimi misiligummik katsorsarneqarnissaanut itigartitsisimaneq aalajangiusimagamiuk.
Taamanikkut Sermitsiaq.AG-mut taanna oqarpoq:
- Aningaasat nukiillu sumut atorneqassanersut aalajangiisariaqarpugut.
Allaaserisaq atuaruk:Tulleriiaarisarnermut ataatsimiititaliaq aalajangiussisimasoq: Kræfteqartoq katsorsarneqassanngilaq
Nalunaarusiami aamma erserpoq, Tulleriissaarisarnermut ataatsimiititaliami ilaasortat peqataasut taasisinnaasut taaseqataasinnaanngitsullu iluarsineqartut, aammalu pisariaqartitsineq malillugu ataatsimittarnerit akuttussusaat allanngortinneqartut, siunnersuummi tamanna paasititsissutigineqarpoq.
Tusarniaanermut killigititaq januaarip qulinganut inissinneqarpoq.