Siunnersuut piareeqqasoq: Kinguaassiuutitigut innarliisimasut sivisunerusumik pineqaatissinneqarsimasut inissiisarfianniittalissasut

Meeqqanik kinguaassiuutitigut innarliisoqarsimatillugu suliani pineqaatissiissutaasartut sivisussusaat ukiuni arlaqartuni oqallisaasarsimaqaat.

Innuttaasut politikkerillu sakkortunerusumik pineqaatissiisoqartarnissaa piumasarisarpaat, piumasarineqartartorlu tamanna Danmarkimi naalakkersuisut maanna malinnialerpaat.

Danmarkimi inatsisinik atuutsitsinermut ministeeriaqarfimmit pingsunngornermi ullup-qeqqanut nalunaarutigineqarpoq, inatsisissat ataatsimoortut Folketingimi suliarineqarnissamut piareersimasut, inatsisissallu malillugit assersuutigalugu meeqqamik pinngitsaaliilluni atoqateqarsimasoq sivisunerusumik pineqaatissinneqarsimasut inissiisarfianniittalissaaq.

Inatsisissat Naalakkersuisut suleqatigilluinnarlugit suliarineqarsimapput.

Pineqaatissiissutaasartoq 50 procentimik qaffanneqartoq

Inatsisinik atuutsitsinermut ministeeriaqarfik tusagassiorfinnut nalunaaruteqarnermi allappoq, inummik 18-it inorlugit ukiulimmik pinngitsaaliilluni atoqateqarsimanermut pineqaatissiissutaasartoq ullumimut sanilliullugu 50 procentimik qaffanneqartoq.

- Tamatuma malitsigisaanik suliani ullumikkut ukiut pingajuat avillugu ukiullu sisamaat avillugu pineqaatissinneqarsimasunut inissiisarfimmiitsitsisussanngorluni pineqaatissiissutaasartut, inatsisip allanngortinneqarneratigut ukiut sisamaat avillugu ukiunilu tallimani pineqaatissinneqarsimasunut inissiisarfimmiititassanngorlugit aalajangiiffigineqartalissapput.

- Tamatuma saniatigut kinguaassiuutitigut pinerluuteqarsimasut Nuummi Pineqaatissinneqarsimasut inissiisarfiannut nuunneqarsinnaanerannut inatsisitigut tunngavissamik suliaqartoqassaaq, pineqaatissinneqarsimasut inissiisarfianni innarliisimasunut immikkut ittumik katsorsaaviliortoqassalluni - innarliisimasut taamaalillutik eqqortumik katsorsarneqarsinnaalissapput aamma innarleeqqissinnaanerat pinaveersaartinnqassalluni, Inatsisinik atuutsitsinermut ministeeriaqarfik allappoq.

Naalakkersuisut suleqatigalugit suliarineqarsimasoq

Inatsit pillugu nutaarsiassaq Naalakkersuisut ukiut kingulliit ingerlaneranni Danmarkimi naalakkersuisunik ataatsimeeqateqartareersut saqqummiunneqarpoq, ataatsimeeqatigiittarnerni meeqqanik kinguaassiuutitigut innarliisoqartarnerata annikillisarneqarnissaanik suliaqarnermut atatillugu sukannernerusunik pineqaatissiisoqartarnissaa Naalakkersuisuanit kissaatigineqartarsimavoq.

- Meqqat arlaannaalluunniit kinguaassiuutitigut innarlinngisaannarneqartussaavoq. Neriuutigaara, inatsisissatut siunnersuut – suliniutit allat arlallit assigalugit - Kalaallit Nunaanni kinguaassiuutitigut innarliisoqartarneranut siunissami annikillisaaqataallunilu meeqqanut inuusuttunullu allanngueqataajumaartoq, inatsisinik atuutsitsinermi ministeri Nick Hækkerup oqarpoq.

Sivisunerusumik pineqaatissiisoqartalernissaata saniatigut, inatsimmi immikkoortut allat arlallit innarlerneqarsimasup inatsisitigut isumannaatsuuneranik nukittorsaasussat ilaatinneqarput.

Innarlerneaqarsimasut tapersersorneqarnerussasut

Pinerluffigineqarsimasunut ilitsersuutit paasissutissallu pitsaanerusut pillugit malittarisassaqalissaaq, aamma politiinut nalunaaruteqartussaatitaaneq atuutsinneqalissaaq, tassani ilaatigut pinerluuteqarsimasoq iperagaappat imaluunniit tv-kkut radiukkulluunniit aallakaatitamut peqataappat, pinerluffigineqarsimasut ilisimatinneqartarnissaat anguniarlugu.

Pinerluffigineqarsimasut aamma killisiuisoqarnerani eqqartuussivimmilu suliaqartoqarnerani illersuisoqarnissamut periarfissagissaartinneqarnerulissapput.

Inatsisinik atuutsitsinermut Naalakkersuisoq suliniutit nutaat atuutsinneqalernissaanut qilanaarpoq:

- Pinerluffigineqarsimasut illersorneqarnerunissaat, pitsaanerusunik paasissutissinneqartarnissaat, meeqqanik kinguaassiuutitigut innarliisoqarnerani akkortunerusumik pineqaatissiisoqartarnissaa aamma innarliisimasunik katsorsaasoqarsinnaanera Kalaallit Nunaanni politikkikkut oqallisigineqartaqaat.

- Taakku tamarmik ataatsimoorlutik innuttaasut inatsisitigut isumannaassusaannik qaffaaqataassapput, Naaja H. Nathanielsen (IA) oqarpoq.

Politiit aaqqissuuteqqinneqassasut

Inatsisissatut siunnersuut Kalaallit Nunaanni Politiit aaqqissuussaanerisa allannguutissaanik aamma imaqarpoq.

Aaqqissuusseqqinnikkut anguniarneqarpoq, Kalaallit nunaanni politiit sulinerminni pitsaanerusunik atugassaqartinneqarnissaat aamma danskit politiivisa pitsaanerusumik ataqatigiissaarneqarlutillu pitsaanerusumik aqunneqarnissaat siunertarineqarpoq.

Peqatigitillugu Politiinut Attuumassuteqanngitsumik Unnerluussisussaatitaasut Misissuisartui Kalaallit Nunaanni politiit pillugit naammagittaalliuutigineqartunik misissuinissamut aalajangiinissamullu piginnaatinneqassapput, Inatsisinik atuutsitsinermut ministeeriaqarfik allappoq.