Siverth napparsimalluni sulinngiffeqalerpoq - akisussaaffiit agguaanneqarput
Siullermik Simon Simonsen stressimik napparsimalluni sulinngiffeqartussanngorpoq, Siverth K. Heilmannilu sapaatip akunnerata siuliani iluaallerpoq, taamatullu Naalakkersuisoqatigiinniikkunnaarallarluni.
Napparsimalersut marluk pissutigalugit Naalakkersuisut Siulittaasuat Kim Kielsen (S) akisussaaffinnik nutaamik ullumi agguaaqqippoq.
Erik Jensenip Siverth K. Heilmannip suliai tiguai
Erik Jensenip, Aatsitassarsiornermut Suliffeqarnermullu Naalakkersuisuusup, Nunalerinermut, Avatangiisinut Ilisimatusarnermullu naalakkersuisoqarfiit, ulloq manna tikillugu Atassummeersup Siverth K. Heilmannip akisussaaffigisimasai, maanna tiguai. Siverth K. Heilmann qanoq sivisutigisumik politikkimik suliaqassanani qinnuteqarsimanersoq, Kim Kielsenip nalunaarutaani allassimanngilaq.
- Aamma aalajangiunneqarpoq Simon Simonsenip napparsimanerata nalaani Inuussutissarsiornermut Nukissiuuteqarnermullu Naalakkersuisup Aqqalu Jerimiassenip Ineqarnermut Attaveqatigiinnermullu Naalakkersuisoqarfimmi suliassat tigummigallassagai, tusagassiutinut nalunaarummi allassimavoq, ilaneqarsimallunilu:
- Nuummili, Ilulissani aamma Qaqortumi mittarfiliornissamut tunngatillugu Inatsisartunut siunnersuutip suliarineqarnerani Aningaasaqarnermut Nunanilu Avannarlerni suleqatigiinnermut Naalakkersuisup Vittus Qujaukitsup suliamik tigumminnittuunera allanngortinneqassanngilaq.
Ilanngullugu nalunaarutigineqarpoq Inatsisartuni oqaluuserisassat ilaat, Ineqarnermut Attaveqatigiinnermullu tunngassueqartut, sapaatip akunnerani matumani oqaluuserineqartussat, isumaqatigiissutit atuutereersut naapertorlugit Naalakkersuisumit Erik Jensenimit aamma Naalakkersuisumit Vittus Qujaukitsumit saqqummiunneqassasut.