Sivisuumik piterartoqassammat kommuni mianersoqqusivoq
Tasiilami piterartoqarnissaanik aarlerisaarisoqarpoq, taamaammat atuarfik meeqqeriviillu matoqqatinneqarput.
![Sivisuumik piterartoqassammat kommuni mianersoqqusivoq](https://image.sermitsiaq.ag/103797.webp?imageId=103797&width=960&height=518&format=jpg)
DMI-p silamik ilimasaarutaa naapertorlugu Tasiilami ullumi piterassaaq, avannaq kippasimmit anorlerluni anoraasuarujussuartut sakkortutingisumik anoraasuartassalluni.
1-5 gradenik ississangatinneqarpoq, seqinnilertarsinnaassallunilu.
Piterartoqarnissaanik aarlerisaarut marlunngornermi aamma pingasunngornermi atuuppoq.
Kommuneqarfik Sermersooq nittartakkamini ilisimatitsivoq Tasiilami nunaqarfiinilu atuarfiit aamma meeqqeriviit kiisalu kommunip allaffeqarfii matoqqatissallugit aalajangersimallutik.
Upalungaarsimanermut pisortaq Jes Damgaard Andersen kommuni naapertorlugu erseqqissaavoq innuttaasut anorersuarujussuarnissaanut piareersarnissaat pisariaqartoq.
- Innuttaasut anorersualinnginnerani toqqissisimanartumiissasut soorlu ilaquttani, ikinngutini eqqaamiorisaniluunniit, anorersuarneratalu sivisusinnaanera aarlerinarmat nerisassanik naammattunik qulakkeerinnissasut siunnersorpai, Kommuneqarfik Sermersooq allappoq.