nersornaasiineq
Small Time Giants Danmarkimi nersornaatinik angisuunik pissarsisinnaapput
Kalaallit nipilersoqatigiit nersornaatinik agguaassinermi, Bands of Tommorow Music Award-imi, nersornaatinut marlunnut inassutigineqarput. Nersornaasiineq pissaaq Københavnimi januaarip naalernerani
Small Time Giants, nuummik saqqummerseqqaakkaminnik Stepscope, inunnit naliliisartunillu nuannarineqarlualersimasut, januaarip 30-anni Københavnimi Kulturhuset Islands Brygge-mi nersornaasiinermi taaguuteqartumi Bands of Tomorrow Music Award, nersornaatinik marlunnik nersornaasigassatut inassutigineqarput.
Ukiumoortumik nersornaasiisarnermi tamatumani Danmarkimi nipilersortartut ukiup qaangiuttup ingerlanerani siunissami ilimanaatilittut nersorniarneqartarput. Nipilersoqatigiit nersornaatinut ´Årets Udgivelse´-mut aamma ´Årets Rock Navn´-imut nersornaasigassatut inassutigineqarput.
– Immikkoortunut marlunnut taama pingaaruteqartigisunut inassutigineqarneq tulluusimaarnartorujussuuvoq, ilami nalunnginnatsigu Danmarkimi nipilersortartutut piukkunnaatilippassuaqartoq. Nipilersoqatigiittut sunik tamanik isumaginnittartutut ingerlaneq imaannaanngitsuuvoq, taamaattumik inassutigineqarneq immikkut iluarusunnaqaaq, nipilersornermut piffissaq asanninnerlu taama angitigisoq atorsimagatsigu. Taamaattumik ullumikkut sumiiffipput angusimavarput, Small Time Giants-ikkut siuttuat Miki Jensen tusagassiorfinnut nalunaarutikkut allappoq.
Small Time Giants nersornaasiinermi marlussunnik atuissapput.
Nersornaaserneqartussatut innersuunneqartut sinneri uani takuneqarsinnaapput