pilluarit
Sofia Geisler KNI-mi pisortatut atorfittaarpoq
KNI A/Sip Sofia Geisler attaveqarnermut pisortatut atorfinitsippaa. Taamaasilluni suliffeqarfimmut tassunga uterpoq tassanimi siulersuisuni ilaasortaanikuuvoq
2014-imi februarip aallaqqaataaniit Sofia Geisler KNI-mi attaveqaqatigiinnermut pisortatut atorfinitsinneqarpoq.
Sofia Geisler 2011-miit maannamut Namminersorlutik Oqartussani tusagassiisarnermut pisortatut atorfeqarpoq.
Sofia Geisler tusagassiortutut ilinniarsimasuuvoq ukiu-nilu arlalinni tusagassiisarnermut pisortatut atorfeqartarsimavoq, soorlu Royal Green-landimi aamma Qaasuitsup Kommuniani. Sofia Tusagassiortunngorniat ilinniarfianni ukiuni arfineq marlunni pisortaasimavoq.
Sofia Geisler aamma KNI A/S-ip siulersuisuini piffissami 2009-2012 ilaasortaasimavoq.
KNI-mi pisortaanerugallartoq Peter Grønvold Samuelsen oqarpoq:
- Ukiuni kingullerni pingasuni KNI namminerisaminik attaveqaqatigiinnermut immikkoortortaqarfeqarsimanngilaq, suliassalli ataasiakkaat tusagassiisarnermi siunnersortinut Danmarkimiittunut assigiinngitsunut imissutigineqartarsimapput. Tamanna maanna allanngortipparput. KNI-p angissusia inuiaqatigiinnilu pingaaruteqassusia eqqarsaatigigaanni, suliffeqarfissuup kiffartuussinermini inuiaqatigiinni inuuniarnikkut atugassarititaasut qanimut ilisimaaralugit aallaavigalugillu suliffeqarfiup iluani avatangiisiminullu attaveqaqatigiinnerup tungaatigut isumaginninnissaa pisariaqarluinnarpoq.
- Qularutiginngilara suliassaq taamaattoq Sofia Geisler-ip sapersaatiginagu isumagilersinnaagaa, KNI-mimi 1.000-it miss. sulisoqartumi suliffeqarfiup iluani pitsaasumik uummaarissumillu attaveqaqatigiinnerup tungaatigut isumaginnittoqartariaqarpugut, sulisorpassuatta ulluinnarni sulinerminni ikorfartorneqarnissaat aamma eqqarsaatigalugu. Taama oqarpoq KNI A/S-imi pisortaanerugallartoq Peter Grønvold Samuelsen.