Sorlak isornartorsiorneqarpoq
Sorlaap sapatip akunnerata siuliani Sisimiuni isumasioqatigiisitsineranni aaqissuussineq peqataasut ilaannit sakkortuumik isornartorsiorneqarpoq.
ICC-mi sungiusaatigalugu sulisoq Mary Hiratsuka Alaskameersoq Sorlaap isumasioqatigiisitsinerani peqataavoq. Taanna isumaqarpoq, isumasioqatigiinneq pitsaanerusumik aaqissuunneqarsimasinnaagaluartoq.
- Isumaqarpunga Sorlaap ilaasortaminut isumasioqatigiissitsiniarsimanera isumassarsiatsialaasoq. Peqatigiiffiit Kalaallit Nunaannit tamaneersut naapisimaarput, isumassarsiatsialaallut arlalissuit oqallisigalugit. Kisianni ... isumaqarpunga isumasioqatigiinnerup aaqqissuunneqarnera pitsaavallaanngitsoq. Isumassarsiat tamakku qanoq ilillugit piviusungortinniarneqarsinaanerat aammalu isumassarsiat qanoq ilillugit ingerlateqqinneqarsinnaanersut eqqartorneqanngillat, Radioaviisimut oqarpoq.
- Pingaarutilerujussuugaluarpoq isumassarsiat qanoq ilillugit piviusunngortinniarneqarsinnaanerat oqaluuserissallugu, allattuiinnarnani oqaluinnarnanilu, Mary Hiratsuka oqarpoq.
Siumup Inuusuttaasa kattuffianni siulittaasoq Benjamin Kielsen oqarpoq, isumasioqatigiisitsinermut aningaasarpassuit atorneqarsimasut, taamaattumik siulittaasup siulersuisunullu ilaasortap ataatsip isumasioqatigiinnermik suli naanngitsoq qimatsinerat pakatsissutigigini.
- Ataatsimiinnerni imaluunniit isumasioqatigiinnerni siulittaasut siulersuisunullu ilaasortat peqataajuaannarnissaat pingaaruteqarpoq, Benjamin oqarpoq.
Isumasioqatigiisitsineq 377.000 kr. missaannik akeqarpoq, peqataasullu sinerissamit tamaneersut 35-iupput.