Spiralilersuisimaneq: Annertunerusumik ikiorsiinissaq Løhdep itigartitsissutigaa
Nunamut namminermut peqqissutsimullu ministerip Sophie Løhdep arnat spiralilersuinermi eqqorneqarsimasut katsorsartinnerannut annerusumik ikiorsiinissamik pilersaaruteqanngilaq.
Maannamut arnat spiralilersuisimanermut tunngatillugu apersorneqarsimasuni ikittuinnaat katsorsartinnissamik kissaateqarsimasut, nunamut namminermut peqqissutsimullu ministerip Sophie Løhdep IA sinnerlugu folketingimi ilaasortamut Aaja Chemnitzimut akissutaani atuarneqarsinnaavoq.
Ministereqarfik akissuteqartinnani Danmarkimi kalaallit illuinut tamanut aamma Psykiatrifondenimut attaveqarsimavoq.
- Nuannaarutigaara arnat misissuinermi apersorneqartut katsorsartinnissamut neqeroorfigineqarsinnaammata. Taakku oqaluttuaat najoqqutaralugu oqaluttuarisaanerput paasisaqarfigisinnaavarput pitsaasumillu ilinniarfigalugu, Sophie Løhde allappoq.
Nammineq nakorsarisaq
Aaja Chemnitzip spiralilersuisimaneq pillugu suliaq Folketingimi arlalinnik apeqquteqarfigisimavaa, apeqqutigalugulu ministerip „arnat spiralilersuinermi eqqugaasimanermi apersorneqartunut katsorsartinnissamut neqeroorutip annertusarnissaanik pilersaaruteqarnersoq“.
IA sinnerlugu Folketingimut ilaasortap akissut naammaginngilaa, Sophie Løhdemi ima ilisimatitsivoq:
- Maannakkorpiarli arnat spiralilersuinermi eqqorneqarsimasut tamarmik katsorsartinnissamik neqeroorfigineqartarnerannik annertusaanissaq pilersaarutaanngilaq, taamaattumik ministeriaqarfiup suli inassutigaa arnat spiralilersuinermi eqqugaasimasut namminneq nakorsaminnut attaveqarnissaat, nakorsammi naliliisinnaammat peqqinnissaqarfiup neqeroorutaasa ilaat arnap pisariaqartitaanut tulluarnersut.