Spiralilersuisimaneq: Arnat 77-it katsorsarneqarlutik oqaloqatiginnittalereersimapput
1965-1975-imi spiralilersuinermi spiralilerneqarsimasunut allatullu naartunaveersaasersorneqarsimasunut akeqanngitsumik katsorsaanissamut neqeroorutip ingerlateqqinnissaanut Naalakkersuisut ilassutitut aningaasaliissuteqarput.
Naqqiut: Allaaserisami siusinnerusukkut allassimavoq, arnat 1960-ikkunni spiralilersortissimasut 4.500-it missannik amerlassusillit tamarmik piumassuserinngisaminnik spiralilersortissimasut. Uppernarsillugu naqissuserneqarnikuunngilaq arnat spralilersorneqarsimasut piumanngitsut ikkussivigineqarsimanersut, taamaallaalli arnat amerlassusaat piffissami tassani spiralilersorneqarsimasut pineqarput.
Spiralilersuisimanermut tunngatillugu akeqanngitsumik katsorsaanissamut neqeroorut soqutigineqarluarpoq.
- Spiralilersuisimanermut tunngatillugu pineqartut akeqanngitsumik katsorsarneqarnissaannut Naalakkersuisut siorna periarfissiipput. Nuna tamakkerlugu periarfissamik atuisut maannamut 77-iupput, Isumaginninnermut Aqutsisoqarfimmi inulerinermut immikkoortortaqarfimmi pisortaq, Naja Lund Kielsen Sermitsiaq.AG-mut ilisimatitsivoq.
Akeqanngitsumik katsorsarneqarnissamut neqeroorut junimi 2022-mi atulerpoq.
Danskit naalagaaffiata 1960-ikkunni spiralilersuisitsisimanera qaqileriffigineqalermat, paasinarsivoq arnat niviarsiaqqallu kalaallit 4.500-it missaannik amerlassusillit spiralilerneqarsimasut, taakkunannga ilaat spiralilerneqarsimanerminnik ilisimasaqanngillat allallu allamik toqqagassinneqarsimanatik.
Naalakkersuisut Isumaginninnermullu Aqutsisoqarfiup ilimagaat arnat maanna 77-it katsorsarneqarnissamik neqeroorummik tigusisimasut saniatigut suli amerlanerusut katsorsarneqarnissamut neqeroorummik atuerusussinnaasut.
Suliniut 800.000 koruuninik aningaasalerneqaqqittoq
Naalakkersuisut ataatsimiinnermi akuersissutigaat suliamut 800.000 koruuninik ilassutitut aningaasaliisoqassasoq, arnat amerlanerusut spiralilersorneqarsimanerup kingorna akeqanngitsumik katsorsarneqarnissamik neqeroorfigineqarsinnaanngoqqullugit.
- Toqqaannartumik ilisimanngilarput arnat qasserpiaat taama pineqarsimanersut, spiralilersuisimanerli pillugu suliami paasinarsivoq arnat ikinnerpaamik 4.000-it taama pineqarsimasut. Katsorsarneqarsinnaaneq pillugu Naalakkersuisup periarfisseereernerani saaffiginnissutit periikkagut tunngavigalugit suliamik ingerlatitseqqiivugut, Naja Lund Kielsen ilisimatitsivoq.
Spiralilersuisimanermut tunngatillugu arnat eqqungaasimasut Tusaanngamut saaffiginnissinnaapput, katsorsarneqarnissamullu innersuunneqarsinnaallutik.
Læs hele sagen:
-
Staten tog min mødom
-
Spiral-kampagne var folkemord
-
Uhyggelig og skamfuld
-
Svært for regeringen at komme udenom spiral-sagen
-
Vi må afdække krænkelser af menneskerettigheder
-
Naalakkersuisut tager afstand fra Spiralkampagnen
-
Grønland bør selv stå for efterforskningen af spiral-sag
-
Start arbejdet med at udrede spiralkampagnen
-
Spiralilersuisarsimaneq pillugu nassuiaasoqarnissaanik suliaq aallartilli
-
Inatsisartut ønsker undersøgelse af spiralsag