Spiralilersuisimaneq: Arnat ilisimatuunut toqqaannartumik oqaluttuarsinnaanngorput
Arnat, spiralilersuisoqarneranit eqqugaasimasut siusinnerusukkut nakorsaaneqarfik aqqutigalugu oqaluttuaminnik apuussisarnikuupput. Maannali Sullissivik iluaqutsiullugu ilisimatuunut misissuitinneqartunut attaviginnittoqarsinnaanngorpoq.
Arnaavit piffissamilu 1960-ip 1991-illu akornanni nammineq piumassuserinngisannik ilisimanngisannilluunniit kingusinnerusukkullu aatsaat nammineq paasinnissimasoq spiralimik ikkussiffitissimallutit? Imaluunniit spiralilersuinikkut naartunaveersaasersuinerup nalaani suleqataasimavit?
Amerlanernit ilisimaneqalereersutut ilisimatuut qanorpiaq pisoqarsimaneranik aammalu minnerunngitsumik eqqugaasimasut oqaluttuassartaannik katersisoqarpoq qulaajaasoqarlunilu, illillu spiralilersuisoqarsimaneranut attuumassuteqarsimaguit, taava suli periarfissaqarputit oqaluttuassat ilisimatuunut apuutissallugu, periarfissaq taanna oktoberip aappaani ukioq manna ammarneqarpoq aappaagulu 1. oktoberip tungaanut paasissutissanik katersisoqassalluni.
- Arnat tamarmik, piffissami taaneqartuni, tassa 1960-miit 1991 ilanngullugu arlaatigut kalluarneqarsimasut oqaluttuassartik ilisimatuunut suliaqartitanut apuussinnaavaat, taamak oqaluttuarpoq ilisimatuut qulaajaasitat pisortaat Tenna Jensen, taanna aamma Ilisimatusarfimmi Issittumi Atugarissaarneq pillugu immikkoortortami pisortaavoq.
Ilisimatuut attaviginissaannut periarfissat arlaqarput
Ilisimatuut qulaajaasinneqartut sulissutiginnipput arnat pisariitsumik toqqissisimallutillu oqaluttuassaminnik apuussisinnaanissaat qulakkeerniarlugu. Pisariillisaanerminni iliuuserisaat kingulleq tassaavoq Sullissivik aqqutigalugu ilisimatuunut toqqaannartumik nalunaarusiortoqarsinnaanngormat. Tamatumalu saniatigut ilisimatuut taakku telefonikkut saaffigineqarsinnaapput.
- Illoqarfinnut toqqakkanut orniguttassaagut, taamaaliornikkut arnat ilisimatuunik qulaajaasitanik toqqaannartumik naapitsillutik oqaluttuassaminnik apuussisinnaanissaannik periarfisseerusukkatta. Manna tikillugu Kalaallit Nunaanni Danmakimilu illoqarfinni arlalissuarni najuutereerpugut, sumiiffinnullu suli amerlanerusunut orniguttarnitsigut paasissutissanik katersinerput ingerlatissavarput, Tenna Jensen oqaluttuarpoq.
Paasissutissat katersorneqartut peqqissaarunneqassapput
Tenna Jensen maannangaaq kisitsisinngorlugu saqqummiussisinnaanngilaq arnat qassit oqaluttuassaminnik apuussereersimanersut.
Mannami tikillugu nunatta nakorsaaneqarfianit arnat oqaluttuaannik paasissutissanillu qulaajakkamut tunngasunik katersineq ingerlanneqarsimavoq. Arnat nakorsaaneqarfimmut oqaluttuaminnik apuussereernikuusimasut oqaluttuarinneqqittussaanngillat, taamaallaalli eqqaamasassarivaat nakorsaaneqarfimmut tunniuteriikkatik ilisimatuunut qulaajaasitanut apuunneqarniassammata akuersissummik atsiortussaassagamik, qulaajaasitallu arnanut taakkununnga allakkatigut saaffiginnittussaapput akuersissummik qinnuigineqarlutik, taamaaliornikkut paasissutissat nakorsaaneqarfimmiit ilisimatuunut tunniunneqarsinnaaniassammata.
- Eqqaamassavarput suliaq matumani pineqartoq inunnut ataasiakkaanut tunngasorujussuummat. Taamaammat arnat pineqartut toqqissillutik oqaluttuassaminnik apuussisinnaanissaat uagutsinnut aamma pingaaruteqarpoq, Tenna Jensen erseqqissaavoq.
Taarsiiffigitinnissamik piumasaqarneq qulaajaasitat suliarissanngilaat
Ilisimatuut qulaajaasitat paasissutissat katersukkatik naammassigunikkit suliarissavaat qulaajaanertaalu naammassillugu suliaralugu. Tamatuma saniatigut ilisimatooqatigiit ilisimavaat taarsiiffigitinnissamik siunertaqarluni suliamik aallartitsisoqarsimasoq, tassungalu tunngatillugu Tenna Jensen erseqqissaavoq taarsiiffigitinnissamik suliaqarneq immikkoormat taamaammallu qulaajaanermi taarsiiffigitinnissamik aallartitsisoqarsimanera ilanngunneqartussaanngitsoq:
- Arnat ilai eqimattanngorlutik piumasaqarput naalagaaffik taarsiiffiginnittariaqartoq ilaatigut inuit pisinnaatitaaffiinik unioqqutitsisoqarsimaneranik tunngavilersukkamik. Tassunga tunngatillugu erseqqissaatigineqarpoq nakorsaaneqarfimmut nalunaarutigineqarsimasut imaluunniit arnat oqaluttuaat qulaajaasitanut toqqaannartumik tunniunneqarsimasut allanut tunniunneqartussaanngitsut. Taamaammat qulaajaasitanit erseqqissaatigineqassaaq arnat, taarsiiffigitinnissamik suliaqartunut ilanngukkumasut namminneerlutik taamatut suliaqartunut ilanngussinnaasut, tamannalu pisinnaasoq Facebookikkut matoqqasumik gruppiannut ilanngunnikkut imaluunniiit eqqartuussissuserisoq tassunga tunngatillugu suliaqartitaq attavigalugu, Tenna Jensen erseqqissaavoq.
Ukiup, upernaap aasallu aggersup ingerlanerani ilisimatuut qulaajaasitat illoqarfinnut nunaqarfinnullu toqqakkanut tikeraartartussaapput. Tikeraarnernullu atatillugu arnat ilisimatuunut toqqaannartumik oqaluttuarnissaminnut periarfissaqassapput. Qaqugu sumilu taakku tikeraarumaarnersut pillugu nittartakkamut imaluunniit aamma Facebookikkut gruppemut matumani innersuunneqartunut ikkunneqartassapput, taakkulu aqqutigalugit tikeraarfissaat malinnaaffigineqarsinnaapput.