KL

DK

Spiralilersuisimaneq pillugu suliaq: Ilisimatusartut Nuummi sisamanngornermi innuttaasunik ataatsimiititsinermut aggersaapput

Ilisimatusartut spiralilersuisoqarsimaneranik suliami qulaajaanermik suliaat pillugit innuttaasut sisamanngornermi paasisaqarnerunissamut periarfissaqassapput.

Spiralilersuisimanermik suliamik qulaajaaneq pillugu Nuummi sisamanngornermi innuttaasunik ataatsimiititsisoqassaaq. Kingorna Odensemi innuttaasunik ataatsimiititsisoqassaaq.
Kassaaluk Kristensen
Published

Ilisimatusartut spiralilersuisimaneq pillugu suliamik aamma piffissami 1960-mit 1991 ilanngullugu allatigut naartunaveersaartitsinerit qulaajarnissaannut toqqarneqarsimasut, qulaajaanermik qanoq suliaqarnerminnik nassuiaaniarlutik innuttaasunik ataatsimiigiaqqusipput.

- Innuttaasut naapinnissaat suliattalu sumut killinnerannik ilisimatitsinissarput qilanaaraarput, qulaajaanermik aqutsisoq Tenna Jensen oqarpoq.

Tamanna Ilisimatusarfimmi, Nuuk, septembarip 7-iat 2023, nal. 16.15 – 19.15 pissaaq, aamma Syddansk Universitet, Odense, septembarip 27-at 2023, nal. 18.00 – 21.00.

- Innuttaasut pingaartumillu suliami inuit eqqugaasut, inuit nammineq oqaluttuaannik aamma qaqugu sumiiffinni assigiinngitsuniinnissarput pillugu ilisimatitsissutiginissaat, innuttaasunik ataatsimiititsinerit siunertarissavaat, Ilisimatusarfimmi ilisimatusarnermut ataqatigiissaarisoq, spiralilersuisimaneq pillugu suliami ilisimatusartut ilaat, Ingelise Olesen, Sermitsiaq.AG-mut oqaluttuarpoq.

Angalassasut

Ilisimatusartut Kalaallit Nunaanni Danmarkimilu angalanertik aallartissavaat, tassani arnanit spiralilersuinermut suliamut ilaasimasunit aamma allatut naartunaveersaatinik akuersiteqqaarnagit atuisinneqarsimasunit nassuiaatinik katersissapput. Nalunaarutit qanoq qaqugulu tunniunneqarsinnaanersut, sisamanngornermi innuttaasunik ataatsimiititsinermi ilisimatitsissutigineqassapput. Innuttaasunik ataatsimiititsineq Ilisimatusarfiup nittartagaatigut toqqaannartumik aallakaatinneqassaaq.

- Innuttaasunik ataatsimiisitsinitsinni innuttaasut oqaloqatigerusuppagut, apeqquteqarnissamut aamma periarfissaqarumaarpoq, Ingelise Olesen oqarpoq.

- Ilisimatusartut suliaqartut tamaasa ilisaritissavagut, pilersaaruterpullu saqqummiullugu. Innuttaasunik ataatsimiititsineq tamanut ammavoq, nittartakkakkullu aallakaatitsinissaq qulakkeerparput, taamaalilluni kikkut tamarmik malinnaasinnaassapput, Ingelise Olesen oqaluttuarpoq.

Innuttaasunik ataatsimiititsisoqarnerani nalunaaruteqarnissamut periarfissaqassanngitsoq, ilisimatusarnermi ataqatigiissaarisoq ilisimatitsivoq, peqataasulli suliaq pillugu ilisimatusartunut apeqquteqarnissamut periarfissaqassapput. Nalunaaruteqarnerit maanna nakorsaaneqarfimmut nassiunneqarsinnaalereerput.

Læs hele sagen:

nunatsinnit inuiagatigiit peqqinnissaq
Powered by Labrador CMS