Spiralimik suliaq pillugu arnat 143-t danskit naalagaaffiat eqqartuussivimmut suliassanngortippaat
Arnat piumassuserinngisaminnik Danmarkimi nakorsanit spiralilerneqarnikut millionilikkaanik taarsiiffigitinnissamik piumasaqarput.
Arnat 143-t 1960-ikkunni 70-ikkunnilu Danmarkimi nakorsanit piumassuserinngisaminnik spiralilersinnikut, Danmark inuit pisinnaatitaaffiinik unioqqutitsinerarlugu eqqartuussivimmut suliassanngortippaat, taama allappoq KNR.
Arnat taakkua katillugit 43 millionit koruuninik taarsiiffigineqarnissartik piumasaraat.
Arnat taakkua siorna oktobarimi taarsiivigineqarnissamik piumasaqaataat danskit naalakkersuisuinit qisuariarfigineqanngimmat taama iliorput, tusagassiorfik allappoq.
Tassani inuit pisinnaatitaaffiinik unioqqutitsineq pillugu arnat 67-it tamarmik immikkut 300.000 koruuninik taarsiivigitinnissamik piumasaqarput. Taamanimiilli arnat taarsiivigitinnissamik piumasaqartut 143-nut amerleriarsimapput.
2023-mi Kalaallit Nunaanni naalakkersuisut aamma Danmarkimi naalakkersuisut aningaasartuutit naatsorsorneqarnissaat aallartippaat.
Arnat eqqartuussissuserisuat Mads Pramming naapertorlugu inuit pisinnaatitaaffii erseqqissumik unioqqutinneqarsimapput.
- Pisimasoq pimoorunniarnagu taarsiissuteqarnissarlu akueriumanagu naalagaaffik aalajangerpoq.
- Taamaattumik eqqartuussivimmut suliassanngortitsisariaqarpugut, tamannami periarfissatuaammat, Mads Pramming KNR-imut oqarpoq.
Spiralilersuisoqarnerani kalaallit arnat niviarsiaqqallu 13-iniit qummut ukiullit 4500-t missaanniittut spiralilerneqarput — ilarpassui akuersisinneqaratik. Spirali naartunaveersaataavoq.
Kingusinnerusukkut arnat kalaallit arlallit spiralilerneqarsimanertik ilisimasimanagu tusagassiuutinut nalunaaruteqarsimapput.
2022-mi juunimi eqqugaasut akeqanngitsumik tarnip pissusaanik ilisimasalimmit katsorsarneqarsinnaalerput.
Naja Lyberth 14-inik ukioqartoq nakorsap qallunaap akuersisinnagu spiralilerpaa. „Arnat illersuisuattut“ ilisimaneqarpoq, oktobarimilu taarsiissuteqarnissamik piumasaqaatip qisuariarfigineqannginneranik danskit naalagaaffiat isornartorsiorpaa.
- Utoqqaanersavut 80-it sinnerlugit ukioqarput, taamaattumik utaqqeqqissinnaajunaarpugut. Inuuginnartilluta immitsinnut ataqqileqqikkusuppugut, illiavullu ataqqileqqikkusuppavut. Meerartaassanersugut meerartaassannginnersugulluunniit naalakkersuisut kikkulluunniit aalajangersinnaanngilaat, Naja Lyberth KNR naapertorlugu oqarpoq.
/ritzau/