Steen Lynge Issittumi Siunnersuisoqatigiinni saarlerpaani issiarusuttoq

Nunanut allanut Naalakkersuisoq Steen Lynge neriuppoq, Kalaallit Nunaat Issittumi Siunnersuisoqatigiit pineqartillugit siunissami isumaqatigiinniarnerni siuttuusalissasoq. Danmarkimillu oqaloqateqarneq isumalluarneqarpoq, nunanut allanut ministeri Jeppe Kofod Nuummut tikeraareersorlu oqaatigineqarpoq.

Nunanut allanut ministeri Jeppe Kofod Nuummut sapaatip-akunnerani matumani tikeraarmat, ilaatigut Kalaallit Nunaata nunat tamalaat akornanni ataatsimiittarfinni saqqumilaarnera eqqartorneqarpoq.

Leiff Josefsen

merete lindstrøm

pingasunn 26. agg 2020 12:52

Annonse

Issittumi Siunnersuisoqatigiinni pissaanermik agguataarineq aatsaat siullermeerlugu oqaluuserineqalinngilaq. Naalakkersuisut siulittaasuattut qinigaarlaap Aleqa Hammond siunnersuisoqatigiit 2013-imi peqataaffigiumanngilai, Sverigemiut siulittaasuuffimmik tigumminnittut Kalaallit Nunaata Danmark peqatigalugu naligisatut peqataasutut issiaqataanissaanut periarfissaanik killiliisimammata.

Oqaluttuassartaa naatsumik

Siulittaasuuffiup Sverigemit 2011-mi tiguneqarnissaa sioqqullugu naalagaaffiup immikkoortortaasa pingasut tamarmik Issittumi Siunnersuisoqatigiinni sulinermut peqataasarnerat ileqquuvoq, naalagaaffiullu immikkoortortai pingasuusut tamarmik Issittumi Siunnersuisoqatigiinni ataatsimiinnerni naligiillutik sinniisuutitaqararlutik, assersuutigalugu nerrivimmi ataatsimiiffiusumi inissat eqqarsaatigalugit. Kisianni Sverigemit suleriaaseq allanngortinneqarpoq, samit nunaminni ikinnerussueqartut assingusumik inissisimaffeqalernissaat pinngitsoortinniarlugu.

Tamanna Aleqa Hammondip naammaginngilluinnarpaa, taamalu siulittaasuuffiup Sverigemit Canadamut tunniunneqarnissaa pillugu maajimi siunnersuisoqatigiinni ataatsimiinneq peqataaffigiumanagu.

Canada siulittaasuuffimmik tigumminnilermat aaqqiissutissamik nassaartoqarpoq, taamalu Kalaallit Nunaat sulinermut peqataaqqilerluni Naalagaaffeqatigiillu peqataasarnerat ukiuni tulliuttuni ineriartorteqqinneqarsimalluni. Danmarkip siunnersuisoqatigiinni oqaaseqarsinnaatitaanera minutsinik pingasunik sivisussuseqartoq maannamuugallartoq Naalagaaffeqatigiinni nunanit pingasunit sivisoqatigiimmik avitseqatigiissutigineqarsimavoq.

Maanna Steen Lyngep akisussaaffimmi agguataarisimanerup nalilersoqqinneqarnissaa piumasaraa. Tamatumani Kalaallit Nunaata ataatsimiiffinni tamani, Kalaallit Nunaata soqutigisaasa oqaluuserineqarfiini, saqquminerunissaa pineqarpoq, erseqqissaalluni oqarpoq.

- Ilaatigut Issittumi Siunnersuisoqatigiit pineqarput, tassanilu angalaqatigiinnut siuttoorusuppugut, Steen Lynge Sermitsiaq.AG-mut oqarpoq.

- Inuiaat kalaallit Kalaallit Nunaallu tassaapput kunngeqarfiup immikkoortortaa Issittumiittoq, taamaammat aamma isumaqarpugut, Kalaallit Nunaata Naalagaaffeqatigiinnit Issittumi Siunnersuisoqatigiinnut aallartitat siuttuuffigissagai, oqarpoq.

Suli anguneqanngitsoq

Sammisaq tamanna politikerinit marlunnit taakkunannga sapaatip-akunnerani matumani tikeraartoqarnerani oqaluuserineqarpoq, Steen Lyngelu isumalluarpoq.

- Isumaqarpunga pitsaanerusumik suleqatigiinnissaq pillugu ammasumik pissuseqarneq Danmarkip tungaanit nunanut allanut ministerimik ataatsimeeqateqarnermi ersarissumik ersersinneqaqqittoq. Qanoq ililluta aaqqiissutissamik kikkut tamarmik naammagisimaarsinnaasaannik angusaqassanerluta maanna oqaloqatigiissutigisariaqalerparput, Naalakkersuisoq oqarpoq.

Oqalliseqatigiinnerilli sumut killissimanerat oqaatigerusunngilaa.

- Qulakkeerinnereertinnanga iliuuseqarnianngilanga, Steen Lynge oqarpoq.

inuiagatigiit politikki