Steen Lynge Issittumi Siunnersuisoqatigiinni saarlerpaani issiarusuttoq
Nunanut allanut Naalakkersuisoq Steen Lynge neriuppoq, Kalaallit Nunaat Issittumi Siunnersuisoqatigiit pineqartillugit siunissami isumaqatigiinniarnerni siuttuusalissasoq. Danmarkimillu oqaloqateqarneq isumalluarneqarpoq, nunanut allanut ministeri Jeppe Kofod Nuummut tikeraareersorlu oqaatigineqarpoq.
Issittumi Siunnersuisoqatigiinni pissaanermik agguataarineq aatsaat siullermeerlugu oqaluuserineqalinngilaq. Naalakkersuisut siulittaasuattut qinigaarlaap Aleqa Hammond siunnersuisoqatigiit 2013-imi peqataaffigiumanngilai, Sverigemiut siulittaasuuffimmik tigumminnittut Kalaallit Nunaata Danmark peqatigalugu naligisatut peqataasutut issiaqataanissaanut periarfissaanik killiliisimammata.
Maanna Steen Lyngep akisussaaffimmi agguataarisimanerup nalilersoqqinneqarnissaa piumasaraa. Tamatumani Kalaallit Nunaata ataatsimiiffinni tamani, Kalaallit Nunaata soqutigisaasa oqaluuserineqarfiini, saqquminerunissaa pineqarpoq, erseqqissaalluni oqarpoq.
- Ilaatigut Issittumi Siunnersuisoqatigiit pineqarput, tassanilu angalaqatigiinnut siuttoorusuppugut, Steen Lynge Sermitsiaq.AG-mut oqarpoq.
- Inuiaat kalaallit Kalaallit Nunaallu tassaapput kunngeqarfiup immikkoortortaa Issittumiittoq, taamaammat aamma isumaqarpugut, Kalaallit Nunaata Naalagaaffeqatigiinnit Issittumi Siunnersuisoqatigiinnut aallartitat siuttuuffigissagai, oqarpoq.
Suli anguneqanngitsoq
Sammisaq tamanna politikerinit marlunnit taakkunannga sapaatip-akunnerani matumani tikeraartoqarnerani oqaluuserineqarpoq, Steen Lyngelu isumalluarpoq.
- Isumaqarpunga pitsaanerusumik suleqatigiinnissaq pillugu ammasumik pissuseqarneq Danmarkip tungaanit nunanut allanut ministerimik ataatsimeeqateqarnermi ersarissumik ersersinneqaqqittoq. Qanoq ililluta aaqqiissutissamik kikkut tamarmik naammagisimaarsinnaasaannik angusaqassanerluta maanna oqaloqatigiissutigisariaqalerparput, Naalakkersuisoq oqarpoq.
Oqalliseqatigiinnerilli sumut killissimanerat oqaatigerusunngilaa.
- Qulakkeerinnereertinnanga iliuuseqarnianngilanga, Steen Lynge oqarpoq.