Steen Lynge Mike Pompeomik ataatsimeeqateqassasoq
Amerikamiut nunanut allanut ministeriata Mike Pompeop ulllumi nunatta nalunaaqutaa malillugu ullup-qeqqanut tusagassiortunik katersortitsinermi ilimatitsissutigaa, sapaatip akunnerata tulliani Danmarkimukarniarluni, ilaatigullu Nunanut allanut Naalakkersuisoq Steen Lynge ataatsimeeqatiginiarlugu.
Mike Pompeop ullumi nunatta nalunaaqutaa malillugu ullup-qeqqanut internet aqqutigalugu tusagassiortunik katersortitsigami ilisimatitsissutigaa, ataasinngorpat Tuluit Nunaannukarniarluni, tamatumalu kingorna juulip 22-ani Københavnimukassalluni.
- Angalaneq "nuannissaqaaq", Mike Pompeo ilisimatitsissuteqarnemini oqarpoq, sammisassarpassuaqarnerarpoq, pingaartumik Taiwanimut, Hongkongoimut Kinamullu atassuteqartarnerit sammineqassallutik. Danmarkimut tikeraarnissani itinerusumik oqaaseqarfiginngilai, Danmarkimili nunanut allanut ministeri Jeppe Kofod oqarpoq:
- Ministereqatimma Mike Pompeop, piffissami matumani nalinginnaasuunngitsumi Københavnimut aqqusaarpat tikilluaqqunissaanut qilanaarpunga. USA Danmarkimut ikinngutaalluartuuvoq, qaninnerpaatullu iliulluni. Danskit amerikamiullu qangarsuarli atassuteqaqatigiittarput, ataatsimeeqatigiinnitsinnullu atatillugu qanimut atassuteqaqatigiitarnitta uppernarsaqqinneqarnissaanut qilanaarlunga.
Taassuma tikeraarnerani danskit nunanut allanut ministeria nereqatigiilluni ataatsimiinnermi aqutsisuussaaq, tassani nunanut allanut ministerit taakku marluullutik oqaluuserisassarpassuit oqaluuserissavaat:
- Nunarsuarmi ataatsimoorluta soqutigisavut, soorlu isumannaallisaaneq, niuerneq Covid-19-illu nunarsuarmi tuniluunnerata nunat tamat suleqatigiinnerannut qanoq kinguneqarnera pillugit oqaloqatigiinnissamut tamatuma periarfissippaatigut, nunanut allanut ministeri Jeppe Kofod oqarpoq.
Kalaallit Nunaat Savalimmiullu
Kalaallit Nunaanni Nunanut allanut Naalakkersuisoq Steen Lynge aamma Savalimmiuni nunanut allanut naalakkersuisoq Jenis av Rana tikeraartoqarneranut atatillugu Københavnimut qaaqquneqasimapputt.
- Issittumi pissutsit aamma oqaluuserisussaagatsigit, Kalaallit Nunaannit Savalimmiunillu naalakkersuisoqatikka soorunami aamma ataatsimeeqataassapput. Tamanna uanga inuttut nammineq pingaartitaraara, nunanut allanut ministeri naggasiivoq.
Amerikami nunanut allanut ministerimik Københavnimut kingullermik tikeraartoqarnera pivoq 2016-imi. Danmarkimi nunanut allanut ministerimik pisortatigoortumik Washingtonimut kingullermik tikeraartoqarpoq 2019-imi, Jeppe Kofodip nunanut allanut ministeri Mike Pompeo ataatsimeeqatigingamiuk. Taamanikkut Nunanut allanut Naalakkersuisuusoq Ane Lone Baggeri, Kalaallit Nunaannut tunngassuteqartut pillugit ataatsimeeqataavoq.
Issittup soqutigineqarnera
Amerikamiut Issittumut soqutiginninnerat ilisimaneqarluarpoq, kingullertigullu Nuummi Issittumi Sakkutooqarfiup illutaani konsulatimik ammaasoqarluni.
Issittoq, pingaartumik russit sakkussiornerat, Kinallu Issittumut soqutiginnilluinnarnera pissutigalugit isumannaallisaanikkut soqutigineqarlualersimavoq.
Mike Pompeop 2019-imi maajip qaammataani pilersaarutaasutut Nuummukarnissaraluni kinguartippaa, tassani taamanikkut nunanut allanut naalakkersuisuusoq Ane Lone Baggeri Danmarkimilu nunanut allanut taamanikkut ministeriusoq Anders Samuelsen ataatsimeeqatigisussaagaluarpai. Taamanikkut Issittumi Siunnersuisoqatigiit Finlandimi ataatsimiinnerannut atatillugu angalavoq, tamatumalu kingorna Berlinimut Londonimullu ingerlaqqilluni, taaakku pereermata Nuummut aqqusaartussaagaluarluni Washingtonimut tuaviinnaq angerlarpoq.