Stress pissutigalugu saaffiginnittorpassuusarput

Peqqinnissaqarfimmi naatsorsuinerit takutippaat stress pillugu saaffiginnittut amerleriarsimasut, nalunaarsuisarnerli nutaajummat kisitsisit mianersuunneqartariaqarput.

Stress pillugu nakorsiartut 2237-it peqqinnissaqarfimmut 2023-mut saaffiginnissimapput. Ukiup siuliani assigusumik saaffiginnissuteqartut 1860-iusut, naatsorsuinerit takutippaat:

Naatsorsuinerit peqqissutsimut naalakkersuisup Agathe Fontainip (IA) Naleqqameersumut Jens Napãtuumut akissutaani takuneqarsinnaapput. Apeqquteqartup paasiumavaa stress inuiaqatigiinni qanoq ajornartorsiutaatiginersoq.

80 procentii Nuummi nalunaarsorsimapput

Naalakkersuisoq ilisimatitsivoq stressimik napparsimalersimasut immikkut naatsorsorneqarsimanngitsut, stressimilli peqquteqarluni peqqinnissaqarfimmut saaffiginninnerit immikkoortunut pingasunut agguarneqarsimasut nalunaarsorneqarsimasut.

- Stressimut attuumassuteqarsinnaasut pillugit attaveqarnerit nalunaarsorneqartut amerlanerpaartaat Nuummi peqqissaavimmeersuupput. 2023-mi attaveqartunit tamanit 80 %-ii Nuummeersuupput, tassalu Nuummi inuit assigiinngitsut 1.801-it immikkoortunit taanerartunit pingasuusunit ataaseq peqqutigalugu peqqinnissaqarfimmut attaveqarsimapput naalakkersuisoq allappoq nangillunilu:

- Peqqinnissaqarfik naliliivoq inuiaqatigiinni stress eqqumaffigineqarneruleriaertuinnartoq peqqinnissaqarfimmummi saaffiginnissutit stressimut tunngasut siornatigornit amerlanerusut tigusalerpai, taakkulu stressimut attuumassuteqartutut nalunaarsorneqartarput, nalunaarsuinerit aallaqqaataaniikkaluartut.

Naalakkersuisut isumaqarput inuiaqatigiinni stress eqqumaffigineqarnerusariaqartoq, ersiutit pinaveersaartitsinissarlu pisariaqartumik suliniutigineqartariaqarmata, taamatullu stress nappaatitut oqimaallivallaaqqunagu iliuuseqartoqartariaqarmat.