napparsimalluni sulinngiffeqarneq
Suka K. Frederiksen: Sakkortusimaqaaq
Namminiilivinnermut, Nunanut Allanut Nunalerinermullu Naalakkersuisoq Suka K. Frederiksen napparsimalluni sulinngiffeqareerluni sulileqqippoq.
Taanna nappaassuarmik kræftimik eqqugaalluni nakosaasersorneqarnissanilu pisariaqalermat aggustip qaammataata naanerani napparsimalluni sulinngiffeqarnini aallartippaa.
- Suliffinnut uteqqinnissannut qilanaarnikooqaanga. Piffissap ingerlasimanera nalorninarlunilu sakkortusimavoq, taamaattorli katsorsarneqarlungalu ikiorluarneqarnera qujamasuutigeqaara. Namminiilivinnermut, Nunanut Allanut Nunalerinermullu Naalakkersuisoqarfimmi akisussaaffimma suliffigeqqilernissaanut qilanaarlunga sulinissara nangeqqissavara, Suka K. Frederiksen tusagassiuutinut nalunaarummi oqarpoq.
Sapaatip-akunnertalu ingerlanerani Københavnimukassaaq tassani nunarsuarmioqatigiinni ataatsimeersuartitsinissami decembarip aallaqqaataani pisussami qaaqqusisooqataassalluni, tassanilu ilaatigut FN-ip nunarsuarmi Issittumi Kalaallit Nunaannilu nunap iluani ataatsimoorussamik ataavartumik anguniagaasa 17-iusut piviusunngortinniarneri pillugit oqaaseqassalluni.
Suka K. Frederiksenip saniatigut peqataassapput assertuutigalugu Danskit Nunanut allanut ministeriat Anders Samuelsen aammalu Aningaasaqarnermut Akileraartarnermullu Naalakkersuisoq Aqqaluaq B. Egede, ataatsimeersuarneq kunngissamit Frederimmit ammarneqassaaq.