Sukkulaat 6 grammi peqqissutsimut iluaqutaavoq
Sukkulaammik qernertumik nerinnginnissamut utaqqatsissutissaqanngilaq. Tyskit misissuinerat malillugu ullormut 6-8 grammimik sukkulaammik qernertutoraanni tamanna peqqissutsimut iluaqutaasorujussuusoq.
Sukkulaatinngersut sukkulaatitunnginnerusunit aamikkut naqitsinikinnerupput iluaallernissaminnullu 39 procentimik ulorianartorsiunnginnerullutik, tamanna tyskit misissuinermikkut paasivaat. Taamatut allappoq nutarasiassaqartitsivik ritzau.
- Imatorsuarlu sukkulaatitortariaqanngilaq, dr. Brian Buijsee, tyskit inuit nerisaannik institutianneersoq Videnskab.dk-mut oqarpoq.
- Ullormut 6 grammiinnaat naammaqaat, taanna oqarpoq.
Taamaasilluni sukkulaat 100 grammi sapaatip akunnera allortarlugu nerisaraanni ullormullu tamusserfigilaartarlugu peqqissutsimut iluaqutaavoq.
- Inuit sukkulaatitunnginnerpaat ullormut 6 grammiinnarmik anginerusumik sukkulaatitortarpata inuit 100.000-iugaangata uummallulersut 85-inik ikinnerussapput, inuillu misissorneqartut tamakkua ukiuni qulini malinnaavigineqarput, Brian Buijsee oqarpoq.
Ilisimatuut 1994-imiit 98-imut inunnik 20.000-inik 35-iniit 65-inut ukiulinnut annertuumik misissuinerminnit paasissutissat misissorsimavaat.
Tyskit ilisimatuui malillugit kakao-p imaa flavanoler assigiinngisitsisuuvoq. Flavanoler taqqanit kvælstofilte-mik piiaasuusorineqarpoq. Taamaasilluni taqqani nukeeqqat allisarput aap naqitsinera annikillisillugu. Kvælstofilte-p aamma aap aqqutai pitsaanerulersittarpai, aak ingerlalluarnerulersillugu.
Sukkulaat taartoq immummit sukkulaatiliamit kakao-qarnerullunilu flavanoler-eqarneruvoq. Siusinnerusukkut misissuinerit takutissimavaat sukkulaat taartoq peqqinnermut iluaqutaanerpaajusoq.
Ilisimatuulli erseqqissaatigaat sukkulaat peqqinnartuugaluartoq. Akerlianilli kaloriaqarneruvoq, pualavallaarnerlu peqqinnanngilaq. Taamaattumik imatorsuaq sukkulaatitortoqassanngilaq.