Suleqatigiissitsigut aningaasaqarnikkut ajornartorsiortut
Suleqatigiissitsisut naatsorsuutitik ukiup affaa sinnerlugu kinguaattooreerlutik tamanut saqqummiussimavaat. Naatsorsuutit takutippaat, 2020-mi 146.258 koruuninik amigartooruteqartoqarsimasoq, taamalu partii nammineq aningaasaatimigut amigartooruteqareersoq amigartooruteqarnerulersimalluni.
Suleqatigiissitsisut 2020-mut naatsorsuutitik Inatsisartut nittartagaatigut maanna saqqummiussimavaat. Suleqatigiissitsisut partiinut allanut sanilliullutik naatsorsuutitik kukkunersiuisumut uppernarsartillugit atsiortissimanngilaat.
Naatsorsuutit takutippaat 148.258 koruuninik amigartooruteqartoqarsimasoq, taamallu annertutigisunik amigaartooruteqarsimanermi partiip nammineq aningaasaatimigut amigartoorutai 268.756 kooruninngorlutik amerlisimapput. Partiit allat 2020-mut naatsorsuutiminni nammineq aningaasaatimikkut amigartooruteqarsimanngillat.
Suleqatigiissitsisut 2020-mi 1.162.250 koruuninik isertitaqarsimapput, taakkunannga 7.250 koruunit ilaasortat akiliutaasigut isertinneqarsimallutik, sinnerullut Inatsisartut tapiissutaasigut isertinneqarsimallutik. Partii katillugit 1.304.826,40 koruuninik aningaasartuuteqarsimavoq.
Naatsorsuutit kingusinaartumik suliarineqarsimasut
Naatsorsuutit siorna juuni 30-nili tunniunneqareersimasussaagaluarlutik kingusinaartumik tunniunneqarsimapput. Partiimit siusinnerusukkut ilisimatitsissutigineqarnikuuvoq, kingusinaarnermut pissutaasoq, partiimi ilaasortaasimasut siulittaasumik Tilie Martinussenimik politiinut unnerluutiginnerisa malitsigisaannik politiit misissuisinerat.
Politiinut unnerluutiginninnermi tunngaviuvoq, partiip aningaasaataanik nammineq inuttut atuisimaneq.
Naatsorsuutit maanna tamanut saqqummiunneqareeraluartut, partii Inatsisartunut suli akiligassaqarpoq.
Naatsorsuutit kukkunersiorneqarsimanissaat piumasaqaataasoq
Inatsisartunimmi aningaasatigut tapiissutit pineqartillugit, naatsorsuutit kukkunersiorneqarsimasut tunniunneqarnissaat piumasaqaataammat. Inatsisartut Allattoqarfianni siunnersuisuuneq Kent Fridberg ilisimatitsivoq:
- Suleqatigiissitsisut naatsorsuutaasa kukkunersiorneqarsimannginnerat ilumoorpoq, aamma Naalakkersuinikkut sulinermut aningaasatigut tapiissuteqartarneq pillugu Inatsisartut inatsisaanni § 9, imm. 2 naapertorlugu Suleqatigiissitsisut 2020-mut naatsorsuutaat Siulittaasoqarfimmit suli tiguneqarsimanngillat, Kent Fridberg allakkatigut akissuteqarluni ilisimatitsivoq, nangillunilu:
- Partiit naatsorsuutaasa tamanut saqqummiunneqarnissaat pillugu Inatsisartut Inatsisaanni piumasaqaataanngilaq, naatsorsuutit kukkunersiorneqarsimanissaat. Akerlianilli Naalakkersuinikkut sulinermut aningaasatigut tapiissuteqartarneq pillugu Inatsisartut Inatisaanni piumasaqaataalluni.
Partiinut aningaasatigut tapiissuteqartarneq pillugu inatsimmi allassimavoq, naatsorsuutit kukkunersiorneqarsimasut tunniunneqanngippata, Naalakkersuisut aalajangersinnaagaat, tapiissutaasimasut tamakkerlugit ilaannakortumiluunniit utertinneqassasut.
Suleqatigiissitsisut naatsorsuutinut atatillugit oqaaseqartinniarneqarnerat suli iluatsinneqanngilaq.