Suleqatit ilaqutarilerlugit
Kalaallit Nunaannisakkutuut imarsiortutumiarsuaataannutjuullikkunni ilaasuulluniimmikkuullarilluinnarpoq,juulleraluallaraangammiangerlarsimaffik ungasillugusulisoqartarmat.
Kalaallit Nunaanni sakkutuut imarsiortut umiarsuaataannut ilaasuulluni juulli immikkuullarilaarpoq. Tamaanimi sillimajuaannartoqartarpoq pisoqassagaluarpallu ikiuinissamut piareersimasoqarluni, – juulleraluarpat ukiortaajugaluarpalluunniit. Amerlanerpaallu allat ilaquttatik peqatigalugit juullisioraluarpata.
Umiarsuarmi alapernaarsuummi Tritonimi attaveqaqatigiinnermut siumiuusoq, aappassaanillu umiarsuarmi ilaquttani Danmarkimiittut ungasillugit juullisiorluni misiliinikoq, sakkutuut naalagaat, Ida Kraunsøe Zahle, taama oqaluttuarpoq.
- Ukiut marluk tulleriisiinnarlugit suliffinni juullisiornikuuvunga. Siullermik Kalaallit Nunaanni, tassani Kangilinnguani juulli nalliuttorsiutigaarput. Illersornissaqarfimmi atorfeqarninni ukioq siulliuvoq, ilaquttannullu maqaasinera annertugaluartoq, suna tamarmi nutaajullunilu pissanganarpoq.
- Ilaquttakka qimallugit juullisiornera qanoq qisuariarfigissanerlugu nammineerlunga annilaangagilaarpara, decembarilli ullui sukkaannaq ingerlasarput, aamma umiartoraangatta taamaappoq.
Nissiaqqat qinngasaarisartut aamma juullimut ammartakkat
- Pisarnertut ullut malunnartinniartarpavut, nissiaqqanik qinngasaarisoqalaarluta juullimullu ammartakkanik isiginnaaqatigiilluta. Tamanna ilutigalugu ukiup ataatsip iluani ullorpassuit peqatigiittartilluni suleqatit saniatigut ilaqutanngortarput.
- Nunarsuarmi tamani ingerlatitsisoqartuaannartariaqarpoq, juulleraluarpaluunniit. Suut tamaasa eqqarsaatigalugit, atorluaasariaqartarpugut. Ukiut taakku marluk decemberimi sakkutuut imarsiortut umiarsuaataanniinnikka nuannerlutillu puigunaatsorsinaqaat.
Illersornissaqarfiup umiarsuaataanni decembari sioqquterujussuarlugu juulli aallartittartoq, sakkutuut naalagaat Thomas Belsø, umiarsuarmi alapernaarsuummi Tritonimi pisortaasoq, oqaluttuarpoq.
Kikkut tamarmik juullerpalaartorsiussapput
-Juullikkunni angerlarsimaffitsinniit ungasikkaluarluta, aammalu ilaquttavut ikinngutivullu peqatigisinnaanngikkaluarlutigit – immaqaluunniit angerlarsimasinnaanngeqqissaaraluarluta – inuttat tamarmik juullerpalaarneranik misigisaqarnissaat isumagisarparput.
- Qaammat decembari sioqquterujussuarlugu piareersarnerit aallartittarput. Pilersuinermut immikkoortortaqarfiup nunagisatsinniit taqussat piffissaqarluarluni inniminnernissaat isumagisarpaa, juullip nalaani pisarneq malillugu juullisunnitsunik iggavik sassaalliisinnaaniassammat, umiarsuarmi iffiortoq juullimut kaageeraliassanik naqittaaniassammat, pappilissat assigisaalu inuttat umiarsuarmi juullimut pinnersaatissanik qiortaasinnaaniassammata.
- Nalinginnaasumik sapaassuarmi juullerpalaartorsioqqaartarpugut. Umiarsuarmili sulinermut ataqatigiissikkuminaassinnaasarpoq, taamaattumik ukioq manna novembarip 28-ani Ilulissani umiarsualivimmi talinnganitsinni juullerpalaartorsiussaagut.
Juulliaqqami naalagiarnerit
- Inuttat ataatsimoorlutik juullerpalaartorsiornermik misigisaqarnissaannut piffissaliisarpugut. Ilai juullimut pinnersaasiortarput, ilaasalu iggavimmi iffiortoq juullimut kaageeraliortoq ikiortarpaat, ilaalu ulitanik qalaassisarput. Juullerpalaartorsiornermik siammaassinermik tunniusseqataajumalluta aqaguani illoqarfimmiut soqutiginnittut umiarsuarmut qaaqqusarpavut, Thomas Belsø oqaluttuarpoq.
- Ukiut ilaanni iluatsitsilluta sakkutuut imarsiortut palasianik umiartoqateqartarpugut. Palasimik ilaasoqaraangatta, umiarsuarmi sapaassuarmi naalagiartitsisoqartarpoq, assinganillu juulliaqqami naalagiartitsisoqartarluni. Umiarsuarmi palasimik ilaasoqanngikkaangatta, Kalaallit Nunaanni najukkami palasi inuttanut naalagiartitsisinnaanissaanik aaqqissuussiniartarpugut.
- Ingerlaaqatigiinnermi uniformiusartunik naalagiarnissamut inuttat tamarmik atisisarput, naalagiarnerlu naggaserlugu viinnimik skåleertarpugut, juulliaqqamilu immitsinnut pilluaqqulluta.
Juulli aqutsisut suliassaraat
- Amerlanerpaartaasugut juullikkunni ilaquttavut ikinngutivullu peqatigerusuttaraluarpagut. Taamaattoqarsinnaanngippallu, immamimi suliassaqarmat, angerlarsimaffitsinni asasatta maqaasineri avissaaqqanerilu oqinnerpaajutikkumallugu, sapinngisarput tamaat iliuuseqartarpugut.
- Inuttat maqaasisaqaraluarlutik ajunnginnissaasa qulakkeernissaanut, pisortatut umiarsuarmi aqutsisut allat peqatigalugit, immikkut ittumik pingaaruteqarpugut. Pingaartumik eqqumaffigisarparput juullikkunni ilaquttat qimaqqaneri pillugit artornartorsiortoqarnersoq. Taamaattoqaraangat, sapinngisarput tamaat isumagisarpavut.
Hangarimi juulliaqqami nerrinneq
Umiarsuarni alapernaarsuutini angisuuni Tritonitut ittuni qulimiguullip hangariani juulliaraq nalliussineqartarpoq, tassani inuttat tamarmik nereqatigiinnissaannut inissaqartarmat, naak nalinginnaasumik sakkutuunut aqumiunullu nerisarfimmi nerisoqartaraluartoq.
- Ualeq atortarparput juulliaqqami nerrinnissamut isumagisassat isumagalugit piareersaallutalu. Umiarsuaq juullerpaluttumik pinnersarneqaqqilaartarpoq, kusanartumillu nerriviliortoqarluni. Hangarimi nerrinnissamut tamatta inissaqarumalluta qulimiguulik umiarsuup qaavanukaanneqartarpoq. Iggaviup mamarluinnartunik juullisunnitsuliornissani isumagisarpaa, Ida Kraunsøe Zahle oqaluttuarpoq, taannalu aamma risalamandemik mamarisaqaavinngikkaluarluni qaqqortarissamik nassaarluni misiliinikuusimavoq.
- Ukiut ilaanni risalamande mamarinngikkaluarlugu qaqqortarissamik eqqugassaq eqqorpara. Alussaammik ooqattaarnissaanut kimigiiserfigineqarpunga, qaqqortariarlu tassaniippoq.
- Nerrisereeraangatta juullip orpiliaa kaavittarparput juullerpaluttunillu erinarsorluta. Angerlarsimaffimminniit poortukkanik tunissutisiassaminnik nassarnikut eqimattanngoriarlutik puiaasarput. Taava unnuup naalernerani tunissummik qutsaviginninniarluni angerlarsimaffimmut sianertoqarsinnaavoq, Ida Kraunsøe Zahle oqaluttuarpoq.