Sulianut aqutsisoq Ocean Explorer pillugu: Pisut ilungersunaraluartut oqaluttuatsialaavoq
Issittumi Sakkutooqarfiup Ocean Explorer suli qanimut malittaraa. Umiarsuulli ikkarlinneranik isumaginninneq maannamut naammagisimaarneqarluartoq, Issittumi sulianut pisortaq oqarpoq.
Ocean Explorerip inunnik 206-inik issimasoqarluni Tunup Avannaarsuani ikkarleqqanerminit kaanngarsimaneranik nutaarsiassaq sisamanngornermi ullup-qeqqata siornatigut tusarliunneqarpoq.
Nutaarsiassaq Issittumi Sakkutoqarfimmi, pisumik isumaginninnissamut akisussaaffeqarsimasumi, naammagisimaarneqarluarpoq:
- Naammagisimaarinnilluinnarpunga. Ocean Explorerip Tarajumit nusunneqarluni kaanngartinneqarsimaneranik tusagarput nutaarsiassatsialaavoq. Tamanna sunik tamanik ajornannginnerulersitsivoq.
- Suli misissugassaqaaluppoq, malinnaavugullu, kisianni tamanna umiarsuup kangerlummi Alpefjordimi ikkarleqqaannarsimasinnaagaluarneranut tamatuminngalu suliarinnittussaasimagaluarnitsinnut sanilliullugu allaanerulluinnarpoq, Issittumi Sakkutooqarfimmi sulianut pisortaq, kommandørkaptajn Brian Jensen, Sermitsiaq.AG-mut oqarpoq.
Pinngortitaleriffik: Inuttavut pikkorissut tulluusimaarutigisorujussuuavut
Ocean Explorer Pinngortitaleriffup umiarsuaanit Tarajumit ikiorneqarluni kaanngartinneqarpoq. Pinngortitaleriffik tusagassiuutitigut nalunaarummi paasissutissiivoq, umiarsuaatileqatigiiffik niuernerpalaartumik isumaqatigiissuteqarfigineqarsimasoq:
Pinngortitaleriffik naapertorlugu umiarsuaq takornariartaat kaanngartinneqarsinnaasimavoq saneraanit nusunneratigut, tamatumalu peqatigisaanik kitsap umiarsuup ikkarlisimasup saneraanit tassannga aamma nusunneqarneratigut.
- Tarajumi inuttatsinnit pikkorissunit umiarsuup nusullugu kaanngartinneqarnera tulluusimaarutigaarput, Pinngortitaleriffiup pisoortaa, Josephine Nymand, oqarpoq.
Brian Jensen sisamanngornermi ullup-qeqqata siornatigut oqaluttuarpoq, Ocean Explorer suli sumiiffimmi ikkarliffigisaminiittoq. Issittumi Sakkutooqarfiup umiarsuaq suli malinnaavigaa:
Ocean Explorer malinnaavigigaat
- Susoqarnersoq suli soqutigaarput, aamma Knud Rasmussen sumiiffiup tungaanut suli ingerlaarpoq. Imaanngikkaluarpoq Ocean Explorerimik pisoqaqqinnissaa ilimagigatsigu, kisianni pisoq uagut isitsinni aatsaat naammassissaaq, Ocean Explorerip angalanini nangippagu Kalaallit Nunaatalu imartaa qimappagu, Brian Jensen oqarpoq, Tarajorlu aamma nersualaarlugu:
- Tarajumit suliniuteqarneq ajunngilluinnarpoq, aamma Namminersorlutik Oqartussat umiarsuaataata pissusiviusuni pisumik annertunertigut aaqqiissuteqarfiginnissimanera ajunngilluinnarpoq.
Ikkarlinnerup kinguneranik Naalakkersuisunut ilaasortat arlallit oqaatigaat, umiarsuit takornariartaatit angalasarnerinut maleruagassat sukaterneqassasut. Brian Jensenip politikkimut tunngasut isummersorfigerusunngilai, oqarlunili oqallinneq malinnaavigineqartoq:
- Politikkikkut apeqqutaavoq, kisianni suliamik isumaginninnitsinnut attuumassuteqarpoq, taamaattumik qanoq pisoqarneranik soqutiginnilluta soorunami malinnaavugut, Brian Jensen oqarpoq, pisorlu oqaluttuatsialattut isiginerarlugu:
- Suleqatigiinneq ajunngilluinnartoq
- Ocean Explorerimik pisoq oqaluttuatsialattut isigerusuppara, ima paasillugu, suliaq maanna pitsaasumut killissimasoq inunnik ajoqusertoqarani, avatangiisinillu innarliisoqarani, Brian Jensen oqarpoq, nangillunilu:
- Pisup ingerlanerani Kalaallit Nunaanni oqartussanik immikkoortortanillu iliuuseqartinneqartunik ajunngilluinnartumik suleqateqarsimavugut, taamaattumik oqaluttuatsialaavoq, tassani takutinneqarmat, ikioqatigiikkaangatta suliamik ajunngilluinnartumik naammassisaqarsinnaasugut.
Knud Rasmussenip Ocean Explorerimut ornigunnermini ullunik arlalinnik atuisariaqarnera uissuummissutigineqarsimavoq. Brian Jensen erseqqissaavoq, pissutsit ajornerulissagaluarpata allanik periarfissaqartuaannarsimasoq:
- Imaassinnaaviq sunit tamanit ungasissorujussuarmiittoqartoq, aamma umiarsuatsinnit Knud Rasmussenimit, kisianni taava allanik qanittumiittoqarpoq. Taakkua aamma Kitaata kujataanut, umiarsuatta piffissap ingerlanerani inissisimaffigisaanut, sanilliullutik Islandimut qaninnerusumiipput.
- Taamaattumik pisumi pinasuartumik inuit inuunerisa ulorianartorsiortinneqarfigisaanni umiarsuarmut ornigunnissamut allanik periarfissaqartoqarsimassagaluarpoq.