Suliat meeqqanut tunngasut ombudsmandip nalunaarusiaani imartusut
Inatsisartuni partiit tallimanngormat ombudsmandip nalunaarusiaata imaanut isummerput. Pingaartumik suliat meeqqanut tunngasut ombudsmandip suliaani annertupput.
Inatsisartut ombudsmandiannit nalunaarusiaq tallimanngormat Inatsisartunut ilaasortanut saqqummiunneqarpoq.
Partiit aamma Naalakkersuisut nalunaarusiamut isummerlutillu innuttaasut inatsisitigut isumannaatsuunerisa aamma oqartussat suliassanik suliarinnittarnerisa qanoq nukittorsarneqarsinnaanerat oqallisigaat.
Pingaartumik suliat meeqqanut tunngasut initupput
Inuiaqatigiit kalaallit unammilligassaasa annerpaat ilagaat, suliat meeqqanut tunngassuteqartut qanoq kommuninit naammassiniarneqartarnersut.
Naalakkersuisut siulittaasuat erseqqissaavoq Naalakkersuisut tungaannit assut eqqumaffigineqartoq qulakkeerniarneqarusuttorlu suliat meeqqanut tunngasut eqqortumik suliarneqartarnissaat. Tamannalu qulakkeersinnaajumallugu Naalakkersuisut kommuninik suleqateqarlutik assigiinngitsutigut suleriaatsinik nutaanik atuutsitsilersimapput, taamaaliornikkut suliat meeqqanut tunngasut suli pitsaanerusumik suliarineqartarnissaat qulakkeerniagaalluni.
Naalakkersuisut siulittaasuata erseqqissaatigaa piffissami 2020-2023-mi kommunini meeqqat pillugit suliassanik sullissinermi annertuumik pitsanngorsaaniarluni suliniuteqartoqarsimammat. Ilaatigut kommunit tamaasa suleqatigalugit sullissinermi periusissiortoqarsimavoq, taamaalilluni digitaliusumik sullissinermi ingerlariarnerit tamarmik ingerlanneqartalersimallutik, taakkualu tamarmik suleriutsimut digitaliusumut immiunneqarsimallutik.
Ataatsimiinnermi matumani Naalakkersuisut meeqqanik tapersersuisarneq pillugu Inatsisip allannguutissaanik siunnersuuteqarput, tassani kommunit tamarmik meeqqanik sullissinermi digitaliusumik suleriaaseq atussallugu pisussaaffilerneqarnissaat siunnersuutigineqarluni.
Tamatuma saniatigut kommunini tamani sanilerisamik ilinniartitsilluni pikkorissaasoqarsimavoq. Kommunini unammillernartut annersaaraat isumaginninnermi ilinniarluarsimasunik sulisussaaleqineq, pingaartumik isumaginninnermi siunnersortinik, Naalakkersuisut siulittaasuat, Inatsisit atuutsinneqarnerat pillugu ataatsimiiititaliamit siunnersuummut akissuteqaammini erseeqqissaavoq.
Meeqqat ombudsmandimut maalaaruteqarsinnaapput
Inatsisartut ombudsmandiat sulinermini atuuffippassuaqarpoq innuttaasut pisortanit sullinneqarnerat pillugu aammalu inatsisit malillugit pisortat sullissinerannik nakkutilliinermini.
Naak taassuma taaguutaa "Inatsisartut ombudsmandiat" immini Inatsisartunik sullissisussatut paasineqarsinnaagaluartoq, aammalu suliassaasa qitiusut ilagigaluaraat inatsisiliortut aalajangiineri (inatsitit, peqqussutit, nalunaarutit il.il.) malillugit inatsisinik atuutsitsisut sulinersut nakkutigissallugit, taamaattoq ombudsmandi innuttaasunut tamanut atuuppoq, aamma meeqqanut.
Meeqqanut paasiuminarsakkamik ombudsmandi uani takuneqarsinnaasumik ilitsersuuteqarpoq qanoq ilillutik meeqqat ombudsmandimut anngussinnaanersut naammagittaalliuuteqarlutillu.
Jeremiassen-ip Leth taarserpaa
Pisortat ingerlatsiviisa suliffeqarfiisalu ilaanni piffissap ingerlanerani annertuumik sulisut taarseraattarniartut, ombudsmandi maanna tunuartoq, Vera Leth, ukiuni 26-ni ataannartumik ombudmanditut sulisimavoq.
Maanna atuuffimminit tunuarsimalereerpoq suliallu tullerminut Gedion Jeremiassen-imut tunniussimalereerpai, taannalu atuuffittaamini sulilluni aallartereernikuuvoq, taamaattorli nalunaarusiap Inatsisartuni oqaluuserineqarnerani Inatsisartut oqaluttarfimminniit tallimanngornermi tikilluaqquaat sulilluaqqullugulu.